ଶେଷ ଫଗୁଣ ଚିଠି
ଶେଷ ଫଗୁଣ ଚିଠି
ଫଗୁଣ ଆସିଛି ,କେତେ ଆଦର ପାଉଛି ,ଦେଖ ତୁମେ
ଏକା ମୁଁ ବସିଛି ,ଖୋଜୁଛି ତୁମକୁ ମନେ ମନେ |
ତୁମେ କହିଥିଲ ,ଯାଉଛ କାମରେ ,ଆସିବ ବେଗି ଫେରି ,
ଆଖି ମେଲି ମୁହିଁ ଚାହିଁ ବସିଅଛି ମନକୁ ମାରି |
କେତେ କେତେ କଥା କିଏ କହୁଛନ୍ତି ,ଦେଉଛନ୍ତି ଅପବାଦ ,
କଣାରେ ଶୁଣୁଛି ,କୋହକୁ ଚାପୁଛି ,କରୁନାହିଁ କିଛି ପ୍ରତିବାଦ |
ଆସିଥିଲି ତୁମ ସାଥେ ,ଧରି ତୁମ ହାତ ବାହାହୋଇ ,
କେତେ ସରାଗରେ ,ସଜ ହେଉଥିଲି ନିତି ତୁମରି ପାଇଁ |
ତୁମେ କହୁଥିଲ, ଚାନ୍ଦ ପରି ମୋର ହସ ବୋଲି ,
ଲାଜରେ ଝାଉଁଳି ମୁଁ ସେବେ ,ଥିରି ଥିରି ହସୁଥିଲି |
ତୁମ ପ୍ରେମରେ ପଡି ହୋଇଛି ଏବେ ପାଗଳୀ ପରି ,
ତୁମ ବିରହ ବେଦନା ,କୁହ ସହିବି କେତେ କିପରି ।
ଦୂରେ ଯାଇ ତୁମେ ,ଲେଖିଥିଲ ଶେଷ ଫଗୁଣ ଚିଠି ,
ବଡ଼ ଆନନ୍ଦରେ ଖୋଲି ପଢ଼ିଥିଲି ତାକୁ ଆଖିକୁ ତରାଟି |
ସେ ଫଗୁଣ ଯାଇ ଏବେ ଆସିଛି ନୂଆ ହୋଇ ,
କିନ୍ତୁ ,ତୁମେ ଆସୀନାହଁ ,ବସିଛି ଏବେବି ତୁମକୁ ଚାହିଁ |
ତୁମ ଘରଲୋକେ ,ସାଇପଡିଶା ମୋତେ କଲେ କେତେ ହୀନିମାନ ,
ପୁଷ ମାସରେ ମୋର ହାତୁ ,ଭାଙ୍ଗିଦେଲେ ଚୁଡ଼ି ଶଙ୍ଖାମାନ |
ପୋଛିଲେ ମଥାରୁ ତୁମ ପାଇଁ ନାଇଥିବା ସିନ୍ଦୁର ଟୋପା ,
ଧଳା ଶାଢ଼ୀ ପିନ୍ଧାଇ ,କରିଛନ୍ତି ମୋତେ ବିଧବା ରୁପା |
କହିଲେ ସେମାନେ ,ଏବେ କହୁଛନ୍ତି ,ତୁମେ ଫେରିବ ନାହିଁ ,
କିନ୍ତୁ ,ମନରୁ ମୋର ତୁମ କଥାର ବିଶ୍ୱାସ ଯାଇନାହିଁ |
ତୁମେ କହିଥିଲ ,ଖେଳିବା ଫଗୁ ,ମିଶି ଆମେ ଫଗୁଣରେ ,
ବାରେ ବାରେ ତୁମେ ଲେଖିଥିଲ ,ଶେଷ ଫଗୁଣ ଚିଠିରେ |
ସାଇତି ରଖିଛି ,ତୁମ ଶେଷ ଫଗୁଣ ଚିଠି ଯତନରେ,
ବିଧବା ହୋଇଛି ,ଏବେ ଖେଳିବି ଫଗୁ କାହା ସାଙ୍ଗରେ ।
ଏବେ କୁହ ମୋତେ ,କାହିଁକି ଏମିତି ତୁମେ କରିଲ
ଶେଷ ଫଗୁଣ ଚିଠି ଲେଖି ,ମୋତେ ଭଣ୍ଡେଇ ଦେଲ ।