ଯା' ଦେବୀ ସର୍ବଭୂତେଷୁ
ଯା' ଦେବୀ ସର୍ବଭୂତେଷୁ
ଆଦିଶକ୍ତି ମହାମୟା ନାହିଁ ତାଙ୍କର ଆଦି ଅନ୍ତ
ଜଗତ ଜନନୀ ମାଆ ମଙ୍ଗଳକାରିଣୀ
ବ୍ରହ୍ମା ବିଷ୍ଣୁ ମହେଶ୍ଵରଙ୍କର ତେଜରୁ ସମ୍ଭୁତା
ଯୁଗେ ଯୁଗେ ବିଶ୍ବ ବ୍ରହ୍ମାଣ୍ଡର କଲ୍ୟାଣକାରିଣୀ
ପୁରୁଷଶକ୍ତି ହୁଏ ଯେବେ ବ୍ୟର୍ଥ କି ପରାସ୍ତ
ମାତୃଶକ୍ତି ରୂପେ ଦେବୀ ମାତା ହୁଅନ୍ତି ଆବିର୍ଭୁତା
ଅଧର୍ମୀ ପାପୀ ରାକ୍ଷସମାନଙ୍କୁ ସ୍ୱୟଂ ସଂହାରି
ସାଧୁସନ୍ଥ ପାଳି ଧର୍ମ ରଖି ହୁଅନ୍ତି ଅପରାଜିତା
ମାଆ ଆଦ୍ୟାଶକ୍ତି ଯୋଗମାୟା ଦେବୀ ଦୁର୍ଗା
ମହା ମହା ବିପତ୍ତିର ତାରଣେ ସେ ସୁଯୋଗ୍ୟା
ତାଙ୍କଠାରେ ପରାସ୍ତ ହୋଇଥାନ୍ତି ମହାପରାକ୍ରମୀ
ସୃଜନେ ମହାସରସ୍ଵତୀ ପାଳନେ ମହାଲକ୍ଷ୍ମୀ
ଦିବ୍ୟରୂପ ଧାରିଣେ ହୋଇଥାନ୍ତି ଅଷ୍ଟଭୁଜା
ସଂହାର କାଳରେ ହୁଅନ୍ତି ମହାକାଳୀ ଦଶଭୁଜା
ହୋଇ ଥିଲେ ହେଁ ଦେବୀ ସହସ୍ର ଭୁଜା
ଅଷ୍ଟାଦଶ ଭୁଜା ରୂପରେ ସଦା ହୁଅନ୍ତି ପୂଜ୍ୟା
ବ୍ରହ୍ମଶକ୍ତି ହିଁ ଚଣ୍ଡି ସେ ଅନନ୍ତ ଶକ୍ତି ସ୍ଵରୂପିଣୀ
ନାରୀ ହୃଦୟର ଅନ୍ତର୍ନିହିତ ଶକ୍ତି ଜ୍ୟୋତି
ସେ ସ୍ନେହମୟୀ ମମତାମୟୀ ରକ୍ଷାକାରିଣୀ
ତାଙ୍କ ଉତ୍ସାହ ପ୍ରେରଣାରେ ଜୀବନର ପ୍ରଗତି
ଦ୍ୱାପର ଯୁଗରେ କଂସରାଜା ଥିଲା ଅତ୍ୟାଚାରୀ
ରୋହିଣୀ ଗର୍ଭେ ଜନ୍ମିଲେ ତା ବିନାଶର ସୂତ୍ରଧରି
ବିଜୁଳି କନ୍ୟା ରୂପେ କୃଷ୍ଣଙ୍କୁ ଦେଲେ ସହାୟତା
କଂସ ନିଧନେ ମାତା ଦେଲେ ପଥ ପ୍ରଦର୍ଶନ କରି
ତ୍ରେତୟାରେ ସୀତାଦେବୀ ଚଣ୍ଡୀଙ୍କୁ କରି ସ୍ମରଣ
ପୁଷ୍ପଧନୁ ଆଣି ତାଙ୍କଠୁ ଶ୍ରୀରାମଙ୍କୁ କଲେ ଅର୍ପଣ
ସେ ଧନୁ ତେଜେ ଗୁଣେ ନିବୀର୍ଯ୍ୟ ହେଲା ରାବଣ
ଯା' ସ୍ବର୍ଣ୍ଣଲଙ୍କା ଧ୍ଵଂସକରି ହେଲା ତା ମୃତ୍ୟୁର କାରଣ
ଦୁର୍ଗ ଅସୁରକୁ ମାରି ସେ ଘେନିଲେ ଦୁର୍ଗା ନାମ
ମହିଷାସୁରକୁ ମାରି ହେଲେ ମହିଷମର୍ଦ୍ଦିନୀ
ଯୁଗେ ଯୁଗେ ମାତା ଅଛନ୍ତି ଜଗତ କଲ୍ୟାଣେ
ସେ କଲ୍ୟାଣକାରିଣୀ ଅଭୟଦାୟିନୀ ତାରିଣୀ
ପ୍ରାଣ ଶକ୍ତି ରୂପରେ ଦେବୀ ଅଛନ୍ତି ସର୍ବଭୂତେ
ହୃଦେ ଆଣନ୍ତି ଜାଗରଣ ସାରା ଜଗତର ହିତେ
ଅନ୍ତରରୁ ନାଶି ପାରେ ଯିଏ ଆସୁରିକ କୁପ୍ରବୃତ୍ତି
ବାଧା ବିଘ୍ନରୁ ମୁକୁଳି ଯାଇ ଲଭିଥାଏ ଶାନ୍ତି ତୃପ୍ତି।