ଉଠ କାହ୍ନୁ

ବଜା ବଜାରେ ବଇଁଶୀ କାହ୍ନୁ 

ଆଉ ଡେରି କାହିଁକି ,

ମଙ୍ଗଳ ଶୁଭ ନିନାଦ ଉଦଘୋଷୁ ସୁପ୍ରଭାତ

ନିଖିଳ ଜଡ଼ ପରାଣ ଉଠୁ ଜାଗି ପୁଲକି ।

ପୁକାରନ୍ତି ବିହଙ୍ଗମ

କଳକୂଜନରେ ପୂର୍ଣ୍ଣ

   ପାହିଲାଣି ଅନ୍ଧକାର ରାତି,

ଗୋପପୁରେ ଧେନୁବତ୍ସା

ହମ୍ବାରଡ଼ିରେ ଉତ୍କଣ୍ଠା

    ଶୁଭେ ଘଣ୍ଟ ମଙ୍ଗଳ ଆଳତି,

ଉଠ କାହ୍ନୁ, ନନ୍ଦବଳା ତେଜ ସୁପାତି ।

ବଜା ବଜାରେ-----

ମୃଦୁ ମଳୟ ସମୀର

ଯମୁନା ନୀଳ ତରଙ୍ଗ

   ହୋଇଲେଣି ଅଥୟ ଅଧୀର,

ବୁଣିଲେଣି ପୂର୍ବାକାଶେ

ଉଦୟ ଅରୁଣ ରଙ୍ଗ

   ପୁଷ୍ପ ରାଗ ମୂରୁଜ ଅବୀର,

ଉଠ ଶ୍ୟାମ, ଗୋପବାଳା ଛନ୍ତି ଚାହିଁ କି ।

ବଜା ବଜାରେ-----

   --------