ଉତ୍କଳ ମାତାର ଯୋଗ୍ୟତମ ସୁତ
ଉତ୍କଳ ମାତାର ଯୋଗ୍ୟତମ ସୁତ
ଉତ୍କଳ ମାତାର ଯୋଗ୍ୟତମ ସୁତ
ଉଡ୍ରମଣୀ ଗୋପବନ୍ଧୁ ।
ସେବାର ସାଗର ହେ ଉତ୍କଳ ବୀର
ଦୁଃଖୀ, ଦରିଦ୍ରଙ୍କ ବନ୍ଧୁ ।।
ଏକ ପୁତ୍ର ତ୍ୟାଗୀ ଶତ ଶତ ପୁତ୍ର
ତୁମେ ରକ୍ଷା କରିପାର ।
ତୁମେ ହିଁ ତ ସଦା ସବୁ ବାଧାବିଘ୍ନ
ପାରି କର ପାରବାର ।।
ସହସ୍ର ବଦନେ ଫୁଟାଇଣ ହସ
ସବୁ ଦୁଃଖ କର ଗ୍ରାସ ।
ସେ ଦୁଃଖ ପାନରେ ଆହେ କର୍ମବୀର
କେତେ ଯେ ପାଅ ସନ୍ତୋଷ ।।
ଶିକ୍ଷା ଗୁରୁ ତୁମେ ବନ ବିଦ୍ୟାଳୟ
ତୁମରି ହାତରେ ଗଢ଼ି ।
ସହସ୍ର ସହସ୍ର ଶିଷ୍ୟ ଶିଷ୍ୟା କଲେ
ଉଚ୍ଚଶିକ୍ଷା ପାଠ ପଢ଼ି ।।
ଦେଶ ମାତୃକାର ପରମ ସେବକ
ସ୍ବାଧୀନତା ସଂଗ୍ରାମରେ ।
ଝାସ ଦେଇ ତୁମେ ଲଢ଼ି ଲଢ଼ି ଦିନ
ବିତାଇଲ କାରାଗାରେ ।।
କାରା କବିତା ଓ ବନ୍ଦୀ ଆତ୍ମକଥା
ତୁମର ଅମର ଗାଥା ।
ସାହିତ୍ୟ ଜଗତେ ଆଗେଇ ଥିଲ ହେ
ଉଚ୍ଚ କରି ତୁମ ମଥା ।।
ପଞ୍ଚସଖା ମିଶି ଉତ୍କଳ ପ୍ରଦେଶେ
ଦେଖାଇଲ ପରାକାଷ୍ଠା ।
ସେବା, ସାହିତ୍ୟ ଓ ଜାତୀୟ ପ୍ରେମରେ
ଦେଖାଇଲ ମହା ନିଷ୍ଠା ।।
ତୁମ ଆଦର୍ଶରେ ଅନୁଗାମୀ ହୋଇ
ଗଢ଼ିଅଛୁ ଅନୁଷ୍ଠାନ ।
"ମାନବ ସେବା ହିଁ ମାଧବ ସେବା" ଯେ
ତନମନ ଦେଇ ପ୍ରାଣ ।।
ତୁମ ଆଶୀର୍ବାଦ ପାଇ କରିଯିବୁ
ବାକି ଥିବା ସେବା କାର୍ଯ୍ୟ ।
ସେଥିପାଇଁ ସିନା ଅଣ୍ଟା ଭିଡ଼ିଅଛୁ
ଦେଇ ମନୋବଳ ଶୌର୍ଯ୍ୟ ।।
ଜନ୍ମଦିନେ ତବ ନେଉଛୁ ଶପଥ
ଜୀବନଟି ଥିବାଯାଏ ।
ଉତ୍କଳର ମଣୀ ଗାଉଥିବୁ ଗାଥା
ଉତ୍କଳ ମାତାର ଜଏ ।।