ଉଲ୍ଲଂଘନ

ସେଇ ଲିଖିତ ବା ଅଲିଖିତ ସର୍ତ୍ତକୁ 

ଅସର୍ତକ ଭାବେ ଟପି ଗଲା ବେଳେ

ଅସମୟରେ, 

ବ୍ୟଭିଚାରୀ/ସୈରାଚାରୀର ସଜ୍ଞାରେ

ଭୂଷିତ ପ୍ରଥମ ପଦଚାରୀ ସେ |

ଯୌକ୍ତିକତାର ସେ ଅଲଙ୍ଘ୍ୟ ଇସ୍ତାହାରକୁ

ଉପାୟଶୂନ୍ୟ ହୋଇ

ଅତିକ୍ରମୀ ଯିବାବେଳେ 

ନିରୁଦ୍ଦିଷ୍ଟ ବା ନିର୍ବାସନର ଦଣ୍ଡରେ

ନାଚାର ପଥଚାରୀଟିଏ ପରି

'ଗଙ୍ଗା କହିଲେ ଯିବି'ର ସ୍ରୋତସ୍ଵିନୀ

ବା ଅଭିଶପ୍ତ ପାଷାଣି ଅହଲ୍ୟାର ଅଭିମାନିନୀ

ବା ଲକ୍ଷ୍ମଣରେଖା ଅତିକ୍ରମୀ ଥିବା ଜନକ ନନ୍ଦିନୀ | 

ଉଲ୍ଲଂଘନର ସେ ବେନାମୀ ନିୟମ

ଲୋଡେ ନାହିଁ ଯା' ସତ୍ୟ ବା ପ୍ରମାଣ

ଅସହାୟତାର ଅନାବିଳ ପଣ

ଅଥଚ ଅକ୍ଷମଣୀୟ ପରିଣାମ |