ଉଜୁଡା ମନର ଗୀତ
ଉଜୁଡା ମନର ଗୀତ
ଗୀତ ସିନା ଗାଏ ମନଫୁଲାଣିଆ
ଉଜୁଡି ଯାଇଛି ମନ ।
କି ଗୀତ ଗାଇବି କହ ଏବେ ମୁହିଁ
ଶୁଣିବ ଆରେ ମୋ ଧନ ।୧।
ପୋଡା ତିଅଣରେ ଅଛି କି ସୁଆଦ
ଉଜୁଡା ମନର ଗୀତ ।
ଗାଇବି ଶୁଣିବ କଅଣ ଲାଗିବ
କହୁନି ମିଛ ଏ ସତ ।୨।
ସଭିଏଁ ଜାଣନ୍ତି ବନ ପୋଡିଗଲେ
ମନ ପୋଡି ଜାଣେ କିଏ ?
ପୋଡା ମନ ମୋର ପୋଡି ଯାଇଅଛି
ସଦା ମୋ ପରାଣ ଦହେ ।୩।
ଏଇ ମନ ଦିନେ ରଜା ହୋଇଥିଲା
ରାଜସିଂହାସନେ ବସି ।
ରାଇଜଯାକର କଥା ବୁଝୁଥିଲା
ହେଉଥିଲା କେତେ ଖୁସି ।୪।
ଭଲମନ୍ଦ ସବୁ ବିଚାର କରିଲା
କଲା କେତେ ଭଲ କଥା ।
ସଭିଙ୍କର ଦୁଃଖ ହରି ନେଉଥିଲା
ନଥିଲା କାହାର ବ୍ୟଥା ।୫।
ଘୋଡା ଛୁଟୁଥିଲା ଘଡିକୁ ଘଡିଏ
ଆଜି ତ ସେକଥା ନାହିଁ ।
ବଢିଲା ବୟସ ହଜିଗଲା ବଳ
ବୁଦ୍ଧି ବିବେକ ହରାଇ ।୬।
ଉଜୁଡି ଯାଇଛି କାମନା ବାସନା
ବାକି ରହିଅଛି ଯାହା ।
ପ୍ରଭୁପଦେ ତାହା ସମର୍ପିତ କରେ
ସେଇ ଏକା ମୋର ରାହା ।୭।