ଉଆଁସୀ କନ୍ୟା

ଗାନ୍ଧର ଦେଶର ରାଜକୁମାରୀ ଗୋ 

             ଅପରୂପା ସୁନ୍ଦରୀ 

ଆଦ୍ୟ ବସନ୍ତରେ ସଜେଇ ଥିଲ ଗୋ 

           ସପନ ଅସୁମାରି  |

ଉଆଁସୀ କନ୍ୟାଗୋ ବରିନେଲ ଶେଷେ 

               ଅନ୍ଧ ମଣିଷଟିଏ 

ତୁମ ମୁଖ ଚାହିଁ ପାରେ ନାହିଁ କହି 

         " ତୁମକୁ ମୁଁ ଭଲପାଏ |"

 ସପନ ହେଲନି ସତ ବୋଲି ତମେ 

        ଆଖି ଦେଇଥିଲ ବାନ୍ଧି, 

ପକ୍ଷୀ ପରି ମନ ଉଡୁଥିଲା ତୁମ 

       ଉଆସେ ହେଲ ଗୋ ବନ୍ଦୀ |

ଡରୁଥିଲ କାଳେ କହିଦେବ ଆଖି 

       ହୃଦୟ ତଳର କୋହ 

ଧରାପଡିଯିବ କାଳେ କା ଆଖିରେ

      ତୁମରି ଆଖିର ଲୁହ |

ମହାଯୁଦ୍ଧକୁ ପଠେଇ ଦେଲଗୋ 

            ଗୋଟି ଗୋଟି ଶହେ ପୁଅ, 

ଦେଖିତନଥିଲ କୁରୁକ୍ଷେତ୍ରେ ଯେବେ 

         ଛୁଟିଲା ରକତ ସୁଅ |

ବାୟାଣୀ ପରିଗୋ ହସୁଥିଲ ତୁମେ 

      ହସ୍ତିନାର ରାଜରାଣୀ 

କହୁଥିଲ ତୁମେ ଉଆଁସୀ କନ୍ୟା ମୁଁ 

       ଧୃତରାଷ୍ଟ୍ରର ରାଣୀ |