ତୁଣ୍ଡ ବାଇଦ ସହସ୍ର କୋଶ
ତୁଣ୍ଡ ବାଇଦ ସହସ୍ର କୋଶ
କୁଆ ଉଡ଼ି ଗଲେ ଛୁଆ ଉଡ଼ି ଗଲା
ଜଣେ ଜଣ କୁହାକୁହି
ପ୍ରମାଣ କରନ୍ତି ମିଛଟାକୁ ସତ
ସତିଆପଣ ବୋଲାଇ
ଏହିପରି ମଣିଷ
ସମାଜ ବୁକୁରେ ଲଗାଇ କଳଂକ
ଢାଳି ଦେଇଥାନ୍ତି ବିଷ
ତୁଣ୍ଡ ବାଇଦ ସହସ୍ର କୋଶ ।
ଜଗତ ଜନନୀ ମାତା ସୀତାଙ୍କର
ଅଗିନୀ ପରୀକ୍ଷା ନେଇ
ପ୍ରଭୁ ଶିରୀରାମ ସତୀପଣିଆକୁ
ଜନଜଗତ ଦେଖାଇ
ଧୋବା ଧୋବଣୀ ଭାଷ
ଅନ୍ଧାରୀ ବିଜେରେ ଶୁଣି ଶିରୀରାମ
ସୀତା ଦେଲେ ବନବାସ
ଅପରିଣାମଦର୍ଶୀ ମଣିଷ ।
ଏ ଲୋକ ଚରିତ୍ର ଅତୀବ ବିଚିତ୍ର
ଅସତକୁ ସତ ଭାବି
ସଜ ମାଛରେ ବି ପୋକକୁ ପକାନ୍ତି
ସତରେ କି ଅନୁଭବୀ !
ଯେମିତି ଆନ ତୋଷ
ହେଲେ ହରି ନ୍ୟ'ନ୍ତି ସୁଖ ଆଉ ଶାନ୍ତି
ରହିଯାଏ ଅବଶୋଷ
ତୁଣ୍ଡ ବାଇଦ ସହସ୍ର କୋଶ ।
ନିନ୍ଦାକୁ ପ୍ରଶଂସା ପ୍ରଶଂସାକୁ ନିନ୍ଦା
କରିବାରେ ଧୁରନ୍ଦର
ଗୁଜବ ଉପରେ କେତେକ ବିଶ୍ବାସୀ
ମନ କରିଥାନ୍ତି ସ୍ଥିର
ଯିଏ ଭଲ ମଣିଷ
ବିନା ପ୍ରମାଣରେ କୁହାକଥା କେବେ
କରନ୍ତି ନାହିଁ ବିଶ୍ବାସ
ଅନୁସନ୍ଧାନୀ ସତ୍ୟ ପ୍ରକାଶ ।
ମିଛକୁ ଯେମିତି ପ୍ରଘଟ କରନ୍ତି
ଯଦି ସତର ପ୍ରଳାପ
କାନରୁ କାନକୁ ଦିଅନ୍ତେ ପ୍ରସରି
ଜୀବନୁ ଲିଭନ୍ତା ତାପ
ଏହି ତୁଣ୍ଡ ବାଇଦ
ଆହା ! କେତେ ମିଠା ନ ହୁଅନ୍ତା ସତେ
ପୂରି ଉଠୁଥାନ୍ତା ହୃଦ
ଦୂର ହେଉଥାନ୍ତା ପରମାଦ ।