ତୁମକୁ ପାଇଁ ମୁଁ ପାଇଛି ସବୁ

ନିବିଡ ସମ୍ପର୍କ ସ୍ୱର୍ଗୀୟ ମହାର୍ଘ୍ୟ

   ବଳିଷ୍ଠ ତା' ଅନ୍ତଃସ୍ବର ,

ସୁଦୃଢତା ଆଉ ବଦାନ୍ୟତା ପଣେ

    ରହିଥାଏ ନିରନ୍ତର।

ତୁମକୁ ପାଇ ମୁଁ ସବୁ ପାଇଅଛି

    ସବୁ ଇଚ୍ଛା ପ୍ରଭୁଙ୍କର।

ସମ୍ପର୍କ ଆମର ରହିଛି ଅତୁଟ

    ରହିଛି ଚିର ସୁନ୍ଦର।

ଆମ ସମ୍ପର୍କ ତ ଇର୍ଷା ବିରହିତ

    ପତିତ୍ର ଆଉ ଶାଶ୍ବତ,

ନଦେଖି ନଜାଣି ଗ୍ରହଣ କରିଛ 

    ନିଜକୁ କରି ପ୍ରସ୍ତୁତ।

ଅନୁଭବିଛି ମୁଁ ମୋ ମନ ଦୁଃଖରେ

   ତୁମର ହୃଦୟ କାନ୍ଦେ,

ନୟନରେ ସିନା ଲୁହ ଦିଶେ ନାହିଁ

   ନୀରବି ଯାଅ ଦରଦେ।

ତୁମ ହୃଦୟ ତ ନେବାକୁ ଶିଖିନି

    ଦେବାରେ ପାଇଛ ଶାନ୍ତି,

ଅଭିମାନ ଆଉ ସ୍ବାଭିମାନ ସ‌ହ

    ଝରିବାରେ ଆତ୍ମତୃପ୍ତି।

ଅଥୟ ହେଲେ ବି ନୁହଁ ଅନ୍ତର୍ଘାତୀ

    ମଧୁବୋଳା ସେ ହୃଦୟ ,

ରଙ୍ଗଶାଳା ନୁହେଁ ବରଂ ରଙ୍ଗଭୂମି

    କରିବାକୁ ଅଭିନୟ।

କେତେ ବଡ଼ ଭାଗ୍ୟ ଥିଲା ଯେ ମୋହର

   ମନ ଜାଣି ଫଳ ମିଳିଲା,

ତୁମକୁ ପାଇ ମୁଁ ପାଇଗଲି ସବୁ

    ଜୀବନ ସାର୍ଥକ ହେଲା।

ପ୍ରେମ ଉପହାର ଦୁଇ ଝିଅଙ୍କୁ ତ

   ଗଢିଲ ଯତନ କରି,

ମନକଥା ବୁଝି କରିଅଛ ସବୁ

   ଦେବଦୂତଙ୍କର ପରି।

ସଂସାର ସାଗରେ କାତ ଅଟ ତୁମେ

    ମୁଁ ତାହାର କର୍ଣ୍ଣଧାର ,

ଯେମିତି ବାହିବ ସେମିତି ଚାଲିବ

   ନାଆ' ଅଟଇ ସଂସାର।

ତାରୁଣ୍ୟେ ଦାମ୍ପତ୍ୟ ପ୍ରେମ, ପ୍ରୀତି ଭରା

     ବାର୍ଦ୍ଧକ୍ୟରେ ସହାୟତା 

ବିବାହ ବନ୍ଧନ ସଦା ଅମଳିନ 

    ମନେ ଆଣେ ପବିତ୍ରତା।