ତୁମେ ।
ତୁମେ ।
ତୁମେ ମୋ ଜୀବନ ତୁମେ ମୋ ସପନ
ତୁମେ ମୋ ପରାଣ ମିତ
ତୁମ ପାଇଁ ଆଜି ଦୁନିଆ ଦେଖୁଛି
ଲେଖୁଛି ଆଜି ମୁଁ ଗୀତ ।
ଚାଲୁଅଛି ବାଟ ଏଇ ଦୁନିଆରେ
ତୁମକୁ ଭରସା କରି
ଜୀବନର ଏଇ ଚଲା ପଥ ମୋର
କଣ୍ଟାରେ ଯାଇଛି ଭରି ।
ନିରାଶା ଜୀବନେ ଆଶାର ଝଲକ
ଅମା ଅନ୍ଧକାରେ ଦେଇଛ ଆଲୋକ
ଧରି ଅଛ ମୋର ହାତ ।
ତୁମେ ମୋ ଜୀବନ ତୁମେ ମୋ ସପନ
ତୁମେ ମୋ ପରାଣ ମିତ ।
ଏତେ ବଡ ଏଇ ଦୁନିଆରେ ମୋର
ସାହା ତ ନ ଥିଲେ କେହି
ପଡିବା ଆଗରୁ ହାତକୁ ବଢେଇ
ନେଇଛ ମୋତେ କୋଳେଇ ।
ଭୁଲେଇ ଦେଇଛ ସକଳ ଯାତନା
ଆଖି ଲୁହ ଅଛ ପୋଛି
ତୁମ ପରି ଆଉ ଏଇ ଦୁନିଆରେ
କୁହ ବା କିଏ ମୋ ଅଛି ?
ତୁମେ ମୋର ଆଶା ତୁମେ ମୋ ଭରସା
ତୁମେ ମୋ ହୃଦୟ ମୋ ଓଠର ଭାଷା
ତୁମେ ମୋ ଅଭୁଲା ଗୀତ ।
ତୁମେ ମୋ ଜୀବନ ତୁମେ ମେ ସପନ
ତୁମେ ମୋ ପରାଣ ମିତ ।
ଦିଗ ହଜା ହେଇ ଘୂରି ବୁଲୁ ଥିଲି
ନ ଥିଲା ମୋର ଠିକଣା
ଧରି ନେଲ ହାତ ଦେଖାଇଲ ପଥ
ହେବା ଆଗୁ ବାଟ ବଣା ।
ମରୁ ହୃଦୟର ଇଲାକାରେ ମୋର
ତୁମେ ତ ଶୀତଳ ଝର
ବାଟ ଭାଙ୍ଗି କେବେ ଆଡେଇ ଯିବନି
କରିବନି ମୋତେ ଦୂର ।
ତୁମେ ମୋ ନିଃଶ୍ବାସ ତୁମେ ମୋ ପ୍ରଶ୍ୱାସ
ତୁମେ ମୋ ଆରମ୍ଭ ତୁମେ ମୋର ଶେଷ
ତୁମେ ଭାଗ୍ୟ ଭବିଷ୍ୟତ ।
ତୁମେ ମୋ ଜୀବନ ତୁମେ ମୋ ସପନ
ତୁମେ ମୋ ପରାଣ ମିତ ।
ହେଲ ଯଦି ସାଥି ଆହେ ଚକା ଆଖି
ଲୋକ ହସା କରିବନି
ମଶାଣୀ ଭୂଇଁରେ ଜଳିବା ପର୍ଯ୍ୟନ୍ତ
ହାତ ମୋର ଛାଡିବନି ।
କାଳ ବୈଶାଖୀ ଜୀବନରେ ମୋର
ଝଡ ତୋଫାନର ରାତି
ଦଦରା ନାଆର ନାଉରୀ ତୁମେ ମୋ
ରଖ ଅବା କର ଇତି ।
ତୁମେ ମୋର ଗତି ତୁମେ ମୋର ମୁକ୍ତି
ତୁମେ ମୋର ଆଖି ମୋ ଆଖିର ଜ୍ୟୋତି
ହେଲି ମୁଁ ଶରଣାଗତ ।
ତୁମେ ମୋ ଜୀବନ ତୁମେ ମୋ ସପନ
ତୁମେ ମୋ ପରାଣ ମିତ ।