ତୁମେ ଥିଲେ ସାଥେ
ତୁମେ ଥିଲେ ସାଥେ
ମୁଁ ଛାତଟିଏ ଖୋଜୁଥିଲି
ତୁମେ ଛାତିଟିଏ ହେଲ
ମୁଁ ପାଣିଗିଲାସେ ମାଗୁଥିଲି
ତୁମେ ଝରଣାଟେ ହେଲ ।
ମୁଁ ଆକାଶେ ଚାହୁଁଥିଲି
ତୁମେ ଛତା ଟିଏ ଦେଲ
ମୁଁ ପ୍ରଜାପତି ହେବି କହିଲି
ତୁମେ ଫୁଲ ବଗିଚା ହେଲ ।
ଗୀତ ପଦେ ହେବା ପାଇଁ
ପ୍ରବଳ ଇଛାଟିଏ ଥିଲା
ତୁମ କଂଠେ ସବୁ ଗୀତ
ମୋର ସିଡି ହୋଇଗଲା ।
କାନ୍ଦିବିନି କେବେ ବୋଲି
ଲୁହ ମୋ ଶୁଖିଲା
ସେଇ ଲୁହ ତୋଳି ନେଇ
ତୁମ ଆଖି ଗାଧୋଇଲା ।
ଖାଲି ପାଦେ ଚାଲିବିନି
ପିଚୁରେ ଫୋଟକା ହେବ
ତୁମ ପାଦ ଚପଲ କରି
କହିଲା ମୋତେ ଚଲାଇବ ।
ମୋ ସହ ବାଟ ଚାଲି
ମୋ ଦୁଃଖକୁ ଗଣ୍ଠିଲି କରି
ସାଥୀ ତୁମେ ମୋର ଆହା
ଅସୁମାରୀ କଷ୍ଟ ସହିଲ ।
ତୁମେ ଥିଲେ ସାଥେ ମୋର
କାହାକୁ ନାହିଁ ମୋ ଡର
ଚାଲୁଛି ଚାଲୁଥିବି ଏମିତି
ଥକିବନି ପାଦ ମୋର।