ତୁମେ ଓ ମୁଁ
ତୁମେ ଓ ମୁଁ
ତୁମେ ବସନ୍ତ ମୁଁ କୋଇଲି
ଶିହରିତ ତୁମ ପରଶେ
ତୁମେ ଫଗୁଣ ମୁଁ ବଉଳ
ଫୁଟିଉଠେ ତୁମ ପିୟୂଷେ ।
ତୁମେ ଅବିର ମୁଁ ଆତୁର
ବୋଳି ହେବା ପାଇଁ ଦେହରେ
ତୁମେ ମେଳଣ ମୁଁ ଝୁଲଣ
ଏକାଠି ଏ ଦୋଳ ନିଶାରେ ।
ତୁମେ କହ୍ନାଇ ମୁଁ ରାଧିକା
ଝୁରି ମରେ ତୁମ ବିହୁନେ
ତୁମେ ବଇଁଶୀ ମୁଁ ମୁର୍ଚ୍ଛନା
ପାଗଳିନୀ ପ୍ରେମ ଦହନେ ।
ତୁମେ ସାଗର ମୁଁ ତରଙ୍ଗ
ରହିପାରେ ନାହିଁ ମଉନେ
ତୁମେ ଆକାଶ ମୁଁ ବିହଙ୍ଗ
ଉଡିବୁଲେ ତୁମ ଅଙ୍ଗନେ ।
ତୁମେ କଦମ୍ବ ମୁଁ ଯମୁନା
ପାଶେ ପାଶେ ରହି ସନ୍ତୁଷ୍ଟ
ତୁମେ ମଧୂପ ମୁଁ ସୁମନ
ଛୁଇଁ ଯାଇ କର ଉଚିଷ୍ଟ ।
ତୁମେ ମଳୟ ମୁଁ ମାଳତୀ
ସୁବାସିତ ତୁମ କାରଣେ
ତୁମେ ଦେବତା ମୁଁ କୁସୁମ
ଅସ୍ତିତ୍ଵ ମୋ ତୁମ ଚରଣେ ।
ତୁମେ ମନ୍ଦିର ମୁଁ ଆଳତି
ଜଳୁଥାଏ ତୁମ ପ୍ରାଙ୍ଗଣେ
ତୁମେ ରସିକ ମୁଁ ଯେ ଦାସୀ
ବସିଅଛ ମୋର ପରାଣେ ।
ତୁମେ ଚନ୍ଦନ ମୁଁ ସୁବାସ
ମହକୁ ଅଛି ଚତୁର୍ଦ୍ଦିଗ
ତୁମେ ନୟନ ମୁଁ ସପନ
ତୁମ ବିନା ମନେ ବୈରାଗ ।