ତୁମେ ନାହଁ ବୋଲି

ତୁମେ ନାହଁ ବୋଲି ଅଗଣାରେ ମୋର

ଆଉ ତ' ଉଇଁନି ଜହ୍ନ

ତୁମେ ନାହଁ ବୋଲି ଆଉ କା'ପାଖରେ

ବନ୍ଧା ପଡିନି ମୋ ମନ ।

ତୁମେ ନାହଁ ବୋଲି ସିନ୍ଥିରେ ମୋହର

ଦିଶୁନି ସିନ୍ଦୂର ଗାର

ତୁମେ ନାହଁ ବୋଲି ମୋ ଦୁଇ ଆଖିରୁ

ଶୁଖୁନି ଲୁହର ଧାର ।

ତୁମେ ନାହଁ ବୋଲି ଫୁଟେ ନାହିଁ ଫୁଲ

ଉଡୁ ନାହିଁ ପ୍ରଜାପତି

ତୁମେ ନାହଁ ବୋଲି ଚଉରା ମୂଳରେ

ଜାଳୁ ନାହିଁ ସଞ୍ଜବତୀ ।

ତୁମେ ନାହଁ ବୋଲି ଦିନ ସରିଯାଏ

ପାଏ ନାହିଁ କିନ୍ତୁ ରାତି

ତୁମେ ନାହଁ ବୋଲି ଚିଠିରେ ଆଉ ମୁଁ

ଲେଖି ପାରୁନାହିଁ ଇତି ।