ତୁମେ ମୋ ଜୀବନ ନଈ
ତୁମେ ମୋ ଜୀବନ ନଈ
ଜୀବନ ଗୋଟିଏ ଅଙ୍କାବଙ୍କା ନଈ
କେତେବେଳେ କେମିତି ବହେ
କେତେବେଳେ ଦିଶେ ଶୁଷ୍କ ବାଲୁଚର
କେବେ ଜଳେ ଭରିଥାଏ I
କେଉଁଠାରେ ବହେ ସ୍ୱଚ୍ଛ ଜଳଧାର
ଚାହିଁଦେଲେ ଦିଶେ ମୁହଁ
କେଉଁଠି ଗୋଳିଆ ଦିଶେ ତାର ରୂପ
ଦେଖିଦେଲେ ଲାଗେ ଭୟ I
ଏପାରି ସେପାରି ହୋଇବା ପାଇଁକି
କେଉଁଠି ବୁଡେନା ପାଦ
କେଉଁଠି ଅକାତ କାତ ଜଳରାଶି
ଭାଙ୍ଗିଦିଏ ସବୁ ଦମ୍ଭ I
କେତେବେଳେ ବନ୍ୟା ଖାଏ ଦୁଇକୂଳ
ଭାଙ୍ଗିଦିଏ ଘର ଦ୍ୱାର
କେତେବେଳେ ତାର ଛଳ ଛଳ ରୂପ
ଲାଗେ ଭାରି ଆପଣାର I
ଏମିତି ଗୋଟିଏ ନଈ ପରା ତୁମେ
ଜୀବନ ବୋଲି ମୁଁ କୁହେ
କେବେ ତୁମପାଇଁ ମୁହେଁ ହସ ଭରେ
କେବେ ଆଖି ଭରେ ଲୁହେ I