ତୁମେ ମୋ ଅମୂଲ୍ୟ ମଣି

ତୁମ ପଦେ ମୋର ଏ ମନ ପରାଣ

ଅରପି ଦେଇଛି ସବୁ,

ହେ ଆନନ୍ଦମୟ ହୋଇଣ ସଦୟ

ଉଦ୍ଧାର କରିବ ଭବୁ ।

ଧନ, ଜନ, ମାନ କି ହୋଇବ ନାଥ

ତୁମେ ମୋ ଅମୂଲ୍ୟ ମଣି,

କୋଟି ବ୍ରହ୍ମାଣ୍ଡର ସୃଜକ, ପାଳକ,

ସଂହାରକ ଗଲି ଜାଣି ।

ମୁଁ ତୁମର ଆଉ ତୁମେ ଅଟ ମୋର

ଲୋଡ଼ା କୁହ କେଉଁ ଚିଜ,

ତୁମେ ପଠାଇଛ କର୍ମ କରିବାକୁ

ଏ କଥାଟି ଅଛି ହେଜ ।

ଫଳରେ କାହିଁକି ଆଶା ମୁଁ ରଖିବି

ଯା' ଦେବ ତାହା ମୋ ପ୍ରାପ୍ୟ,

ଦିଅ ଭାବ, ଭକ୍ତି, ଧଇର୍ଯ୍ୟ ହେ ପ୍ରଭୋ

ଅବିଗୁଣ କରି ଲୋପ ।

ତୁମ ପଦେ ଲୟ ରହୁ ସଦା ମୋର

ମୁଖ ନାମ ଗୋଟି ଗାଉ,

ଜନ୍ମ ଜନ୍ମାନ୍ତର ଦୋଷ କ୍ଷମା କର

ଆତ୍ମା ଗୋଟି ମୋକ୍ଷ ପାଉ ।