ତୁମେ ଗଲା ପରେ

ତୁମେ ଗଲା ପରେ ସଖି

   ମୁହିଁ ଏକା ଏକା ।

ତୁମ ବିନା ଦୁନିଆଟା

   ଲାଗେ ଫିକା ଫିକା ।।

ତୁମେ ସିନା ଚାଲିଗଲା

   ଜୀବନରୁ ମୋର ।

କେମିତି ଭୁଲିବି ମୁହିଁ

   ସ୍ମୃତି ଯେ ତୁମର ।।

ହୃଦୟରେ ମୋର ତୁମେ

  କରିଅଛ ଘର ।

ଭାବନାରେ ଆସୁଅଛ 

  ତୁମେ ବାରମ୍ବାର ।।

ଆଖିଆଗେ ନାଚୁ ଅଛି

   ତୁମ ରୂପ ଛବି ।

ପାହିଯାଏ ରାତି ତୁମ

  କଥା ଭାବି ଭାବି ।।

ହେଉନାହିଁ ଭୋକ ଶୋଷ

  ଗଲିଣି ମୁଁ ଭୁଲି ।

ଲୋକେ କହୁଛନ୍ତି ମୋତେ 

  ପାଗଳ ତୁ ବୋଲି ।।

ରହୁନାହିଁ ମନ ସ୍ଥିର

  ହେଉଛି ଅଥୟ ।

ଦୁନିଆ ଦିଶୁଛି ମୋତେ

   ତୁମ ରୂପମୟ ।।

ମନେ ପଡୁଅଛି ପ୍ରିୟା

  ଅଭୁଲା ଅତୀତ ।

କେମିତି ଭୁଲିବି ସେହି

   ଅଲିଭା ମୁହୂର୍ତ୍ତ ।।