ଅକୁହା କଥା

ମନ କଥା ତୁମ ଆଗେ କହିବି କିପରି

ତୁମ ବିନା ସବୁ ବିଷ ଦିବା ବିଭାବରୀ

କାହିଁ କେତେଦିନୁଁ ମୁହିଁ କରିଛି ଅପେକ୍ଷା

ନ କହି ହୃଦୟ କଥା କରୁଛ ପରୀକ୍ଷା ।

ହେଲେ ତୁମେ ବୁଝିଲନି ମୋ ହୃଦୟ ବ୍ୟଥା

ଆଜି ଯାଏଁ ଖୋଲି କହିଲନି ମନକଥା

ଲାଜର ଓଢଣା ଟାଣି ବସିଅଛି ମୁହିଁ

କେମିତି କହିବି ନିଜ ସୀମା ରେଖା ଡେଇଁ ?

ଥରେ ହୃଦୟରୁ ଦେଖ ମୋ ଦୁଇ ଆଖିକୁ

ନିଶ୍ଚୟ ପଢିପାରିବ ମୋ ମନ କଥାକୁ

ତୁମେ ଅଛ ହୃଦୟର ପ୍ରତି ସ୍ପନ୍ଦନରେ

ତୁମେ ହିଁ ରହିଛ ମୋର ପ୍ରତି ନିଃଶ୍ୱାସରେ ।

ପଢ଼ିଛି ତୁମ ମନର ଅକୁହା କଥାକୁ

ବୁଝିଛି ମୁଁ ତୁମ ହୃଦୟର ଭାବନାକୁ

ଅପେକ୍ଷାର ଅନ୍ତ କରି ମୋର ପ୍ରାଣପ୍ରିୟ

ତୁମ ପ୍ରେମ ବରଷାରେ ଭିଜିବାକୁ ଦିଅ।

ମନେ ବାନ୍ଧେ ଅସୁମାରୀ ଆଶା ଓ ଭରସା

ଆସିବ ତୁମେ ଗୋ ଦିନେ ମୋ ହୃଦୟ ରାଜା

ହାତରେ ଶଙ୍ଖା ମଥାରେ ସିନ୍ଦୂର ପିନ୍ଧେଇ

ଘରଣୀ କରିବ ମୋତେ ସାତ ଜନ୍ମ ପାଇଁ