ଅଗଣାରେ ହେବି ମୁଁ ବାସ ତୁଳସୀ

ଅଗଣାରେ ହେବି ମୁଁ ବାସ ତୁଳସୀ 

କରିଦିଅ ଆହେ ପ୍ରଭୁ 

ସୁବାସିତ କରି ଗୃହ ମାନଙ୍କରେ

ସାଧି ଯିବି ହିତ ବହୁ ।

ଦୂର କରି ରୋଗ କରିବି ଆରୋଗ୍ୟ 

ଦୀନ ଦୁଃଖୀ ଦରିଦ୍ରର 

ଦେବା ଦେବୀ ସେବା ପୂଜାରେ ମୁଁ ଲାଗି

ଧନ୍ୟ ହେବି ନିରନ୍ତର ।

ଆହେ ଦୟାମୟ ବିଶ୍ଵ କାରୀଗର

ଏତିକି କରୁଣା କର

ଅଗଣାରେ ହେବି ମୁଁ ବାସ ତୁଳସୀ 

ଆଶା ମୋ ପୂରଣ କର ।

ସବୁ ଦେବା ଦେବୀ ପୂଜାରେ ଲାଗିବି

ଭକତ ଜନଙ୍କ ଗହଳେ

ମାଳି ହୋଇ ମୁଁହି ନିତି ଝୁଲୁଥିବି

ଭକତି ଭାବ ବିହ୍ବଳେ  । 

ଆହେ ଦୟାମୟ ପରମ ଈଶ୍ୱର

ମହାପ୍ରଭୁ ପରାତ୍ପର 

ଗୁହାରୀ କରଇ ତୁମରି ପୟରେ

ବାସ ତୁଳସୀଟେ କର ।

ଅଗଣାରେ ହେବି ମୁଁ ବାସ ତୁଳସୀ 

ପରିବେଶ କରି ଶୁଦ୍ଧ

ପବିତ୍ର ଲହରୀ ଖେଳାଇ ଜୀବନେ

 ପ୍ରବାହିତ କରି ଦିବ୍ୟ ।

ପ୍ରଶାନ୍ତି ପ୍ରଭାରେ ପ୍ରତି ପରିବାରେ

ନାଶିବି ଦୁଃଖ ଆମୟ

ଆଦର ଆଦର୍ଶ ଉତ୍ତମ ସନ୍ଦେଶ

 ବିଚାର , ଚିନ୍ତା , ସୌହାର୍ଦ୍ଦ୍ୟ ।

ଗନ୍ଧ ବହ ସାଥେ ବାଣ୍ଟି ଅବିରତେ

ଆମୋଦିତ ନିତି କରି

ବିତି ଯାଉ ମୋର ଜୀବନ ସଳିତା

ତୁମ୍ଭରି ସେବାରେ ଜଳି ।