କିଛି ଥାଉ ଫଗୁଣକୁ
କିଛି ଥାଉ ଫଗୁଣକୁ
କିଛି ପ୍ରୀତିଫୁଲ ପୌଷେ ଫୁଟି ଝଡୁ
କିଛି ଥାଉ ଫଗୁଣକୁ ,
କାଳେ ଏ ହୃଦୟ ଲୋଡିଵ ମଳୟ
ଵସନ୍ତରେ ବାସିଵାକୁ ।
କିଛି ମନକଥା ଶୀତରାତି ଶୁଣୁ
ଜହ୍ନଟା ଲାଜେଇଯାଉ ,
ବାକି ଯେତେ ଵ୍ୟଥା ଵାସନ୍ତୀ ସନ୍ଧ୍ୟାରେ
ଚୋରା ମଳୟରେ ଵହୁ ।
କିଛି ଚୋରାପ୍ରୀତି ଚନ୍ଦ୍ରଭାଗା ତୀରେ
ମାଘସ୍ନାନ କରୁଥାଉ ,
କିଛି ମଧୁଗୀତି ମହୋଦଧି ନୀରେ
ତିଳତର୍ପଣ ଯେ ଦେଉ ।
କିଛି ସ୍ମୃତି ଭିଜୁ ଶିଶିର ସଞ୍ଜରେ
କିଛି ଥାଉ ଚଇତକୁ ,
ବଉଳ ବାସ୍ନାରେ ମଦିରା ନିଶାରେ
କୁହୁକୁହୁ ଶୁଣିବାକୁ ।
କିଛି ପ୍ରେମ ଥାଉ ପ୍ରିୟତମ ପାଶେ
ବାକିଟା ପ୍ରେମିକ ପାଖେ ,
ଝୁରି ବାରେ କେତେ ଆତ୍ମତୃପ୍ତି ମିଳେ
ରାଧା ଏକା ସ୍ଵାଦ ଚାଖେ ।