ଅନଙ୍ଗ ଅଭିସାରିକା

ହଁ ...ତୁମ ସ୍ପର୍ଶରେ 

ଋତୁ ଆଉ ରାତି 

ଏକାକାର , ମଧୁମୟ 

ମନମୁନ ଖୁନ୍ଦାଖୁନ୍ଦି 

ସାରା ସହର ବିଭୋର .

ଗଦାଗଦା ଅପେକ୍ଷା 

ଜହ୍ନମନସ୍କ 

ତାରାମାନେ ଅବାକ୍ l

ହଁ .. ତୁମେ ଆସିଲେ 

କେତେ ଭଙ୍ଗା ମନ ଯୋଡ 

ପ୍ରେମର ସଉଧ ଗଢ଼

ରଜନୀଗନ୍ଧାର ଗଭାରେ 

ମିଠାମିଠା ସ୍ବପ୍ନ ସଜାଡ

ଝିଲ୍ ମିଲ୍ ପ୍ରୀତିଫୁଲ ଝାଡ l

ଅନଙ୍ଗ ଅଭିସାରିକା ଟିଏ  

ତୁମେ ଖୁବ୍ ମନୋଇ , ଗେହ୍ଲେଇ

ଆଞ୍ଜୁଳେ ଅନୁରାଗରେ 

କେତେ ଆନମନା ହୁଅ

ରାତିର ଉହାଡେ 

ତୁମ ରୋଷଣୀ କହେ ଅନେକ କାହାଣୀ l

କେବେ କୁଆଁରୀ ଲାଜର 

ଶତ ଶିହରଣର 

ସରମୀ ଲତାଟିଏ ତ

କେଵେ ଚିତ୍ରଲେଖା ଓଠେ 

ଏକ ନୀରଵ ନଈର ଗୀତ l

ହଁ .. ତୁମେ ଶୀତ 

ଏକ ମଧୁଵୋଳା ମିତ

ସମ୍ପର୍କର ଅନୁପାତ 

ଏକ ପ୍ରେମ ଲଗ୍ନର 

ମିଳନ ମୂହୁର୍ତ୍ତ l