ତୁମେ ଚିଠିଟିଏ ଦେବ
ତୁମେ ଚିଠିଟିଏ ଦେବ
କଥାଥିଲା ତୁମେ ଚିଠିଟିଏ ଦେବ
ମନକଥା ସବୁ ଲେଖି
ଚିଠିର ଶେଷରେ ଇତି ଲେଖିସାରି
ନାଁ ଲେଖିଦେବ ସଖୀ I
କଥାଥିଲା ସଖୀ ହାତେ ହାତରଖି
ବରଷାରେ ଭିଜି ଭିଜି
ବୁଲୁଥିବା ଆମେ ଲକ୍ଷହୀନ ହୋଇ
ପ୍ରେମରେ ଯିବା ଲୋ ହଜି I
କଥାଥିଲା ସଖୀ ପ୍ରେମର ସାଗରେ
ପହଁରିବା ସାଥି ହୋଇ
ସୂରୁଜ ଚନ୍ଦ୍ରମା ଆକାଶୁ ଆମକୁ
ଖୁସିରେ ଦେଖିବେ ଚାହିଁ I
ତୁମ ହୃଦୟର ଆନ୍ଧାରୀ ମୂଲକେ
ଦୀପଟିଏ ଜାଳିଦେଇ
ହୃଦୟ ତଳର ନିଃଷିଦ୍ଧ ଇଲାକା
ଦେଖାଇବ ମୋତେ ନେଇ I
ଗଢିବା ଗୋଟିଏ ପ୍ରେମର ମନ୍ଦିର
ଆମ ମଧ୍ୟେ ଥିଲା କଥା
ସେଇ ମନ୍ଦିରର କାନ୍ଥରେ ଲେଖିବା
ଆମ ପ୍ରଣୟର ଗାଥା ।
ଅମର ପ୍ରେମର ଅମର କାହାଣୀ
ଲେଖିବା ଆମେ ଲୋ ମିଶି
ଆମ ପ୍ରେମ କଥା ପଢିବେ ସରବେ
ମନେ ମନେ ହୋଇଖୁସି I