ତୁମେ ବି ...

ଆଜି କାଲି ପ୍ରତିଶୃତି ବି

 ହେଲାଣି ଭେଜାଲ

 ଅହରହ ବିଶ୍ଵାସ ବି,

 ସୁଦୂର ବିସ୍ତାରି ସ୍ଵପ୍ନର ନିଲାମ

 ଦିନର ଉଜାଗରେ ବି ।

 

 ମନର ମୃଣାଳରେ ପଦ୍ମ ତୋଳି

 ଭ୍ରମରକୁ ଆତିଥ୍ଯର କାରଣ

 ନିଃସନ୍ଦେହ କେହିବି ... ,

 ପ୍ରେମର ଅନ୍ଧାରରେ ଉବୁଟୁବୁ

 ପଦ୍ମ ଚିତ୍ରପଟ୍ଟରେ ଭ୍ରମର ବି ।

 ଦାନ ପ୍ରତିଦାନର ନ୍ୟାୟରେ

 ଛଳନାର ଅଳିନ୍ଦରେ ନିଷିଦ୍ଧ ପ୍ରହରେ

 ଦିନେ ନିଶ୍ଚେ ଝୁରି ହେବ ,

 ଅଦୃଶ୍ୟ ଅସ୍ପଷ୍ଟ ମୋର ଛବି ବକ୍ଷେ ରଖି

 ଅଶ୍ରୁ ମୁକ୍ତା ଝରାଇବ ।

 ଭେଜାଲ ପ୍ରତିଶୃତିରୁ ଆତ୍ମଚିନ୍ତନରେ

 ସାଉଁଟି ଚାଲିଥିବ

 ଅନୁଭବୀ ହୃଦୟର ବାସ୍ତବତା ,

 ଅଣ୍ଡାଳିବ ଅବିଶ୍ବାସର

 ନିଆଁରେ ପୋଡ଼ି ଥିବା

 ବିଶ୍ଵାସର ଅପରୂପ ସ୍ନିଗ୍ଧତା ।

 ମୋର ସ୍ଵପ୍ନ ସିନା ଯାଇଥିବ ଭାଙ୍ଗି

 କିନ୍ତୁ ତୁମ ସ୍ଵପ୍ନ

 ସୁଦୂର ବିସ୍ତାରି ପାରିବନି ,

 ମୋର ଆତ୍ମା ଘୁରୁଥିବ ଏଠି ସେଠି

 କିନ୍ତୁ ତୁମେ ମୋର

 ଶ୍ମଶାନର ଠିକଣାଟି ପାଇବନି ।