ତୁମ ହାତେ ସବୁ ଅଛି

ଯେଉଁ ଦିନ ଠାରୁ ମନ ଦେହ ମୋର 

କରିଅଛି ସମର୍ପଣ 

ସେହି ଦିନ ଠାରୁ ମୋ କଥା ଭାବିନି

କେବେ ଦିନେ ନାରାୟଣ ।

ଦୁଃଖ କି ସୁଖ ମୋ ପଛରେ ପଡିଛି 

କରି ନାହିଁ କ୍ଷଣେ ଚିନ୍ତା 

ଏତିକି ଜାଣିଛି ମୋ ପାଇଁ ଅଛନ୍ତି 

ଜଗତ ପାଳନ କର୍ତ୍ତା ।

ଆଶା ବାନ୍ଧିଛି ମୁଁ ମୋ ପାଇଁ ପ୍ରଭୁହେ 

ତୁମେହିଁ ଭଲ କରିବ 

ଚରଣାଶ୍ରିତକୁ ଦୟା ନ କରିଲେ

ତୁମକୁ ନିନ୍ଦା ହୋଇବ ।

ତୁମେ ମୋର ବଳ ତୁମେ ମୋର ଦମ୍ଭ 

ତୁମେ ମୋ ସାହା ଭରସା 

ତୁମ ବିନା ଆଉ କୁହ ମହାବାହୁ 

କାହାକୁ କରିବି ଆଶ୍ରା ।

ମୋ ଜୀବନ ରଥେ ତୁମକୁ ସାରଥି 

କରି ସାରିଛି ମୁଁ ଯେବେ 

ମୋ ଠାରୁ ଦୂରେଇ ଯାଇ ପାରିବ କି 

କୁହ ପ୍ରଭୁ ତୁମେ କେବେ ।

ମଲା ଯାଏ ମୋର ପାଶେ ରହିଥିବ 

ବିଶ୍ବାସରେ ମୁଁ ବଞ୍ଚିଛି 

ତୁମରି ଦୟାରେ ଦିନ ଗୁଡିକ ମୋ

ଶୁଭରେ ବିତି ଯାଉଛି ।

ଜଗତର ନାଥ ଆହେ ଜଗନ୍ନାଥ 

ଏତିକି ଦୟା କରିବ

ଜୀବ ଗଲାବେଳେ ତୁମ ଦିବ୍ୟ ରୂପ 

ଥରେ ମୋ ନେତ୍ର ଦେଖିବ ।

ପାପ ପୁଣ୍ୟ ମୋର ବିଚାର ନକରି 

ବଡ ଆଶା ମୁଁ କରିଛି 

ଦୟା ପାଇବି କି ଦଣ୍ଡ ମୁଁ ପାଇବି

ତୁମ ହାତେ ସବୁ ଅଛି ।