ତୁମ ଚିଠି

ତୁମ ଲେଖା ଚିଠି ଗୋଲାପୀ ଲଫାଫା

ଗତକାଲି ମୋତେ ମିଳିଲା

ମଧୁଝରା ଲେଖା ପଢ଼ିଲା ବେଳରୁ

ମନ-ପକ୍ଷୀ ମୋର ଉଡ଼ିଲା (୦)

ଏମିତି ଲେଖିବା ଚତୁରତା ସତେ

କେବେ କାହାଠାରୁ ଶିଖିଲ

ଏତେ ଦୂରେ ରହି ମନକୁ ମୋହର

କେମିତି ଚୋରେଇ ପାରିଲ

ଜାଣ ନାହିଁ ବୋଲି ଯାହା କହୁଥିଲ

ସବୁ କଥା ଧରା ପଡ଼ିଲା..

ତୁମ ଲେଖା ଚିଠି ଗୋଲାପୀ ଲଫାଫା

ଗତକାଲି ମୋତେ ମିଳିଲା (୧)

ଖାଇବା ପିଇବା ଭୁଲିଯିବ ପଛେ

ମୋତେ ଭୁଲିବନି ଲେଖିଛ

ଏଥର ଆସିଲେ ମୋ ପାଇଁ ଆଣିବ

ଚୂଡି ଶାଢ଼ୀ କିଣି ରଖିଛ

ଛୁଟି କାଟି ତୁମେ ସଅଳ ଆସିବ

ତୁମକୁ ମୋ ରାଣ ରହିଲା..

ତୁମ ଲେଖା ଚିଠି ଗୋଲାପୀ ଲଫାଫା

ଗତକାଲି ମୋତେ ମିଳିଲା (୨)