ରାଗ

ରାଗ ଏମିତି କେଉଁ ଦରବ

ବୁଝେଇ ଦେବି ଆସ

ମନ ଲଗାଇ ଶୁଣିବ ଯଦି

ଚକା ପାରିକି ବସ ।

କଥା କଥା କେ ଯାଏ ଯେ ରାଗି

କରି ଏଡ଼ିକି ମୁହଁ

କିଏ ବା ତାକୁ ପାଇବ ଭଲ

ଇଏ ତ ଭଲ ନୁହଁ ।

ହେଲେ ହେଉ ସେ ବଡ଼ କି ଛୋଟ

ରାଗ ହୁଏ ଯା' ମିତ

ଖରାପ ବାଟ ଦିଶଇ ତାକୁ

ହୁଏନା ତା'ର ହିତ ।

ବୁଦ୍ଧି ବିବେକ ହଜଇ ଆଉ

ହୁଏ ସରବନାଶ

ରାଗ ଏମିତି କେଉଁ ଦରବ

ବୁଝେଇ ଦେବି ଆସ ।

ମନେ ଏମିତି ତିଳେ ବି ରାଗ

ଯଦି ବା ଆସେ କେବେ

ସେଇ ବେଳକ ପାରିଲେ ସହି

ଜିଣିଲ ଜାଣ ତେବେ ।

ବୁଝି ବିଚାରି କରିଲେ କାମ

ଲାଜେଇ ଯିବ ରାଗ

ମନରେ ବସା ବାନ୍ଧିବା ପାଇଁ

ପାଇବ ନାହିଁ ବାଗ ।

ରାଗ ଯା କରି ପାରେନା ତାହା

ପାରିବ କରି ହସ

ରାଗ ଏମିତି କେଉଁ ଦରବ

ବୁଝେଇ ଦେବି ଆସ ।