ଜିଇଁବାର ବାଟ

ଜିଇଁବାର ବାଟ ଅନେକ ଥିଲେ ବି

ଏମିତି ଜିଇଁବା ଚାହେଁ ମୁହିଁ

ଗୀତ ଲେଖିଲେଖି ସଭିଙ୍କ ହୃଦୟ

ଯେମିତି ଯାଏ ମୁଁ ଛୁଇଁଛୁଇଁ (୦)

ଝରଣାର କୁଳୁ କୋଇଲିର କୁହୁ

ପିଲାବେଳେ ଯେବେ ଶୁଣୁଥିଲି

କେଜାଣି କେମିତି କିଛି କିଛି ଗୀତ

ଅଜାଣତେ ଲେଖି ଯାଉଥିଲି l

ଗୀତ କଥା କେବେ ନ ଭାବି ମନରେ

ଏମିତି ମୋ ପାଇଁ ଦିନ ନାହିଁ..

ଜିଇଁବାର ବାଟ ଅନେକ ଥିଲେ ବି

ଏମିତି ଜିଇଁବା ଚାହେଁ ମୁହିଁ ll(୧)

ସୁଖରେ ଦୁନିଆ ସଙ୍ଗୀତରେ ଝୁମେ

ଦୁଃଖରେ କିଏ ବା ଶୁଣେ ଗୀତ

ସେ ସୁଖ ଦୁଃଖର ଗୀତ ଲେଖି ଲେଖି

ତନୁମନ ମୋର ପୁଲକିତ l

ଯେମିତି ମୋ ଗୀତ ଭିତରେ ମୁଁ ଦିନେ 

ମଲା ପରେ ପୁଣି ଯିବି ଜିଇଁ..

ଜିଇଁବାର ବାଟ ଅନେକ ଥିଲେ ବି

ଏମିତି ଜିଇଁବା ଚାହେଁ ମୁହିଁ ll(୨)