ତୁମ ଆଗମନେ

ବସନ୍ତ ଆଣିଛି ରଙ୍ଗ ପଟୁଆର 

ରମଣୀୟ ରୂପ ରାଜି

ମାଖିଅଛି ପ୍ରିତୀ ଅବିରର ଆଭା

ପ୍ରକୃତି ହୋଇଛି ସାଜି !

ଫଗୁଣର ଫଗୁ ଗଗନରେ ଉଡ଼େ

କି ସୁନ୍ଦର ସେହି ଶୋଭା

ମଳୟ ପରଶେ ଧରଣୀ ହରଷେ

ମାଧୁର୍ଯ୍ୟ ସେ ମନଲୋଭା !

କୋଇଲି ବଜାଏ ମିଳନର ବଂଶୀ

ସୁରେ ସୁରେ ନାଚେ ବାଆ

ମଧୂପ ସ୍ପର୍ଶରେ ଫୁଲ ହସୁଥାଏ

ରୋମାଞ୍ଚ କି ଦୃଶ୍ୟ ଆହା !

ଗଙ୍ଗଶିଉଳିର ମୃଦୁ ବାସନା ରେ 

ସନ୍ଧ୍ୟା ଲାଗେ ରମଣୀୟ

ପଳାଶ ର ରଙ୍ଗ ଝଟକାଏ ଦିଗ

ସୌନ୍ଦର୍ଯ୍ୟ କି କମନୀୟ !

ବସନ୍ତ ଆଣିଛି ମିଳନର ପର୍ବ

ପ୍ରକୃତି ସୌନ୍ଦର୍ଯ୍ୟ ଭରି

ଶ୍ୟାମ ସଙ୍ଗେ ରାଧା ହୋଇବ ମିଳନ

ପ୍ରିତୀ ମଧୁ ଯିବ ଝରି !

ଆହେ ଋତୁରାଜ ତୁମ ଆଗମନେ

ପୃଥିବୀ ହସଇ ଆଜି

ମାଟି ଠୁ ଆକାଶ ଗାଉଥାନ୍ତି ଗୀତ

ତୁମ ପ୍ରିତୀ ସ୍ପର୍ଶେ ଭିଜି !