ଟଙ୍କା

ଶରୀର ତାହାର ତୁଚ୍ଛ କାଗଜର

ଭାରି ଅମୂଲ୍ୟ ତା ମୂଲ

ନଚାଏ ସଭିଙ୍କୁ ନିଜ ତାଳେ ତାଳେ

କାଠ ପୁତଳିକା ତୁଲ୍ୟ।

ଅସୁବିଧା ସବୁ କରଇ ସୁବିଧା

ସବୁ ଅଭାବକୁ ଦୂର

ସବୁ ଭୟକୁ ସେ ପାରିବ ଦୁରେଇ

ସବୁ ବାଧା ହେବ ପାର।

ଟଙ୍କାର ଅଭାବ ଭାରି କଷ୍ଟଦାୟୀ

ଜୀବନେ ଭରଇ କଷ୍ଟ

ଟଙ୍କାର ବାହୁଲ୍ୟ ଅତି କ୍ଷତିକାରୀ

ସନ୍ତୋଷକୁ କରେ ନଷ୍ଟ।

ବଦଳିଛି ଆଜି ଟଙ୍କାର ମହତ୍ତ୍ୱ

ଏ ଟଙ୍କାର ପରିଚୟ

ସବୁ ଅନର୍ଥର ମୂଳ ସାଜି ସିଏ

ଖେଳାଏ କୋକୁଆ ଭୟ।

ସମ୍ମାନ ସୌହାର୍ଦ୍ଦ୍ୟ ସମ୍ପର୍କ ପ୍ରତିଷ୍ଠା

ଟଙ୍କା ସବୁ ପାରେ କିଣି

ଟଙ୍କା ଥିଲେ ପାଶେ ମୁରୁଖ ରାଜା ବି

ପାରେ ଜଗତକୁ ଜିଣି।

ଜାବୁଡି ଧରିବା ନୁହଁଇ ସହଜ

ବାଲିକଣା ସମ ସିଏ

ଉନ୍ମୁକ୍ତ ବିହଙ୍ଗ ପରି ଆକାଶରେ

ଏ ପାଖେ ତା ପାଖେ ଧାଏଁ।