ଟିକିଏ ଖୁସି

ସକାଳରୁ ସଞ୍ଜ ରାତି ପରେ ଦିନ

  ମାସ ବର୍ଷ ଯାଏ ବିତି

କର୍ମେ ରତ ଅଛୁ ଅବିରତେ

  ପାଇବାକୁ ଟିକିଏ ଖୁସି l

ନିତ୍ୟେ ନବ ଆଶା ବସା ବାନ୍ଧେ

  ମନ ଉପଵନେ ତୋହରି

ସପନର ସୌଧ ଗଢୁ ଗଢୁ

  ସମୟତ ଯାଏ ସରି l

ଦେଖି ଦାରା ସୁତ ପରିବାର

  ମଣୁ ଅତି ଆପଣାର

ସଞ୍ଚିଛୁ ଧନ କୃପଣ ପଣରେ

  ଯତନେ ଗଢିଣ ଘର l

ଜୀବନଟା ପରା ରଙ୍ଗମଞ୍ଚ ଏଠି

 ତୁହି ଏକ କଳାକାର

ଅଭିନୟ ଶେଷେ ଫେରିବୁତୁ ଏକା

  ନଥିବେ ସାଥେସକେ ତୋହର l

ଧନ ଦଉଲତ ଘରଦ୍ୱାର ସବୁ

  ଆବୋରି ବସିଛୁ ମୋହର

ଭୁଲି ତୁ ଗଲୁଣି ମାୟାଜାଲେ ପଡି

  ଶରୀରଟା ନୁହେଁ ତୋହର l

କାଳ ଗର୍ଭେ ଗୋପନ ହେଲେଣି

  ତୋପୂର୍ବ ପୁରୁଷ ଯେତେ

ସାଥିରେ ତାଙ୍କରି ବୋହି ନେଇଗଲେ

   ଧନ ସମ୍ପତ୍ତି କେତେ l

ଯେଉଁ ସୁଖ ଟିକିଏ ଲଭିବା ପାଇଁକି

  ହେଉଅଛୁ ସଦା ବାଇ

ଜାଣିନ ପାରିଲୁ ପ୍ରକୃତ ଆନନ୍ଦ

  ଲୁଚି ରହିଅଛି ଯହିଁ l