ଆସ ହେ ପାଳିବା ମହିଳା ଦିବସ

ମାର୍ଚ୍ଚ ମାସର    ଅଷ୍ଟମ ତାରିଖ

   ବିଶ୍ୱ ମହିଳା ଦିବସ

ପାଳନ ହୁଅଇ  ସଭ୍ୟ ଜଗତରେ

   ଖେଳାଏ ଆନନ୍ଦ ହର୍ଷ ।

ସୃଷ୍ଟି ସର୍ଜନାରେ   ନାରୀର ଭୂମିକା

     ଅଟଇ ଗୁରୁତ୍ୱପୂର୍ଣ୍ଣ

ସୁକର୍ତ୍ତବ୍ୟ ଏଣୁ   ନାରୀ ଅଧିକାର

    ମର୍ଯ୍ୟାଦା ରକ୍ଷା ସମ୍ମାନ ।

ପ୍ରତିଭା ସମ୍ପନ୍ନ   ନାରୀଙ୍କ ଜୀବନୀ

    ଭାବନା କାର୍ଯ୍ୟ କଳାପ

କଲେ ଅନୁଧ୍ୟାନ    ପ୍ରଚାର ପ୍ରସାର

     ବୃଦ୍ଧି ହେବ ସୁସଙ୍କଳ୍ପ ।

ଶିକ୍ଷା ରାଜନୀତି    ସମାଜକଲ୍ୟାଣ

     ଆଇନ ଶୃଙ୍ଖଳା ରକ୍ଷା

ପ୍ରତିଟି କ୍ଷେତ୍ରରେ   ଯୋଗଦେଉ ନାରୀ

      ସଶକ୍ତ ହେଉ ପ୍ରତିଷ୍ଠା ।

ଲିଙ୍ଗ ଭେଦଭାବ    କମୁ ନିର୍ଯାତନା

      ସାମାଜିକ କୁସ°ସ୍କାର

ଦୃଢ଼ ହସ୍ତେ କରୁ    ଆଇନ ଦମନ

      ଅପରାଧ ଭୟ ଦୂର ।

ହେଉ ପ୍ରସ୍ଫୁଟିତ   ମିମୋସା ସୁପୁଷ୍ପ

      ସମୁଜ୍ଜ୍ୱଳ ଭବିଷ୍ୟତ

ଉନ୍ମେଷୁ ସଦିଚ୍ଛା    ପବିତ୍ର ଦିବସ

     ଶକ୍ତି ହେଉ ସୁସ°ହତ ।

ଆସ ହେ ପାଳିବା   ମହିଳା ଦିବସ

     ପ୍ରତି ପୁରେ ନିଜ ଘରେ

ପରଷିବା ସ୍ନେହ   ଶରଧା ମମତା

     ଆନନ୍ଦରେ ଯତନରେ ।