ଟାଣିନେ ଲଗାଇ ଡୋରୀ

ଥରଟେ ଟାଣିନେ ତୋ ଘଟଗାଁପୀଠ

ଡୋରୀ ଲଗାଇ ମୋ ଠାରେ

ଥରଟେ ପୋଛିଦେ ମୋ ଆଖି ଲୁହକୁ

ମାଆ ଲୋ ତୋ ପଣତ ରେ ।

ସିନ୍ଦୂର କିଣିଛି, ମନ୍ଦାର ଆଣିଛି

ଶ୍ରୀଫଳ ଆଣିଛି ତୋଳି

ଅତି ଆଦରରେ କରିବି ତୋ ପୂଜା

ସଜାଇଛି ପୂଜା ଥାଳି ।

ନଡ଼ିଆ ଜଳରେ ଗାଧେଇବୁ ମା'ଲୋ

ପିନ୍ଧିବୁ ତୁ ନାଲି ଶାଢ଼ୀ

କିଣି ଆଣିଛି ମୁଁ ତୋ ପାଇଁ ମା'ଲୋ 

ନାଲି ନାଲି ସଙ୍ଖା ଚୁଡ଼ି ।

ଶାଳୁଆ ଗଛରେ ବାନ୍ଧିବି ଡୋରୀ ମୁଁ

ମାନସିକ ଟିଏ କରି

ଲୁହ ଟୋପେ ଢ଼ାଳି ତୋ ପାଦ ଧୋଇବି

ଜଣାଇବି ମୁଁ ଗୁହାରି ।

ତୋ ପାଖରେ ବସି ତୋ ସୁନ୍ଦର ରୂପ 

ଦେଖିବି ମୁଁ ମନଭରି

ଥରଟେ ଟାଣିନେ ମା'ଲୋ ତୋ ପାଶେ 

ଲଗାଇ ତୋହରି ଡୋରୀ ।