ଟାଳିବ କି ମରଣ
ଟାଳିବ କି ମରଣ
ତୋଳାଇଲେ ବହୁତଳ ଭଵନ
ଘେରାଇ ପ୍ରାଚୀର ଚୁମ୍ବି ଗଗନ
ଗଣ୍ଡା ଗଣ୍ଡା ଶସ୍ତ୍ରଧାରୀ ସିପାହୀ
ଆଲସେସିଆନ ଶ୍ଵାନ ଜଗାଇ
ତେବେ କି ମରଣ
କବଳରୁ ହୋଇଯିବୁ ବାରଣ ।
ପର୍ବତ ସମାନ ଅର୍ଜିଲେ ଧନ
ସମ୍ବର୍ଦ୍ଧନା ମାନପତ୍ରେ ମଣ୍ଡନ
ବିଶାଳ ଉପାଧି କଲେ ଧାରଣ
ଉଚ୍ଚାସନେ କଲେ ଉପବେଶନ
ଲୋକରେ ପୂଜନ
ହେଲେ କି ଟଳାଇ ଦେବୁ ମରଣ ?
ଦଇନିକ କଲେ ମାଂସ ଭକ୍ଷଣ
ଗୋରସ ସ୍ୱାଦିଷ୍ଟ ଦିବ୍ୟ ଭୋଜନ
ଅନିନ୍ଦ୍ୟ ସୁନ୍ଦରୀ କଲେ ରମଣ
ଗଜଦନ୍ତ ପଲ୍ୟଙ୍କରେ ଶୟନ
ଲେପିଲେ ଚନ୍ଦନ
ଛାଡ଼ିଦେବ କିରେ ଯମ ରାଜନ ।
କମ୍ବଳ ଘୋଡ଼ାଇ ହୋଇ ଶୋଇଲେ
ପଣେ ଡାକ୍ତରଙ୍କୁ ପାଖେ ରଖିଲେ
ନିତ୍ୟ କଲେ ପୂଜା ଦେବ ଅର୍ଚ୍ଚନ
ଗୀତା ଭଗବତ କଲେ ପଠନ
ମହାମୃତ୍ୟୁଞ୍ଜୟ
ଗାୟତ୍ରୀ ଜପେ କି ହେବୁ ନିର୍ଭୟ ।
କାଳର ତ କ୍ୟାଲେଣ୍ଡର ନଥାଏ
ଅକସ୍ମାତ ସିଏ ପହଞ୍ଚି ଯାଏ
ବଡ଼ କ୍ରୁର କାଳ ସେ ଅବିଶ୍ୱାସୀ
ନଶୁଣେ କାହାରି ଦୁଃଖ ଫର୍ମାସୀ
ଏଣୁ ବାପ ଧନ
ବେଳଥାଉଁ କର ଧର୍ମ ଅର୍ଜନ ।
ଛଅ ଖଣ୍ଡି କାଠ ହୋଇବ ଲୋଡ଼ା
ମଶାଣିରେ ନିଶ୍ଚେ ହୋଇବୁ ପୋଡ଼ା
ଜୀବନର ମୂଲ୍ୟ ମୁଠେ ପାଉଁଶ
ତନୁ ମରେ ମାତ୍ର ମରେନା ଯଶ
କର ଭଲ କାମ
ଅମର ଅକ୍ଷରେ ରହିବ ନାମ ।