ତୃତୀୟ ବିଶ୍ୱ ଯୁଦ୍ଧ

ରୋଦସୀ ବକ୍ଷରେ ବିଶ୍ୱ ଯୁଦ୍ଧ ତିନି   କରୋନା ପ୍ରଥମ ପକ୍ଷ । ବିଶ୍ୱ ସମୁଦାୟେ ଦେଶର ଜନତା  ଲଢ଼େଇରେ ପ୍ରତିପକ୍ଷ ।୧। ଦେଶ ଦେଶ ମଧ୍ୟେ ଶତ୍ରୁତାର ଭାବ   ଦେଖାଇ ନିଜର ଶକ୍ତି । କେତେ ଅଣୁ ଅସ୍ତ୍ର ପୁଣି କ୍ଷେପଣାସ୍ତ୍ର   ବଢୁଥିଲା ଯୁଦ୍ଧ ତାତି ।୨। ଜଳ ସ୍ଥଳ ସଂଗେ ଆକାଶ ବାହିନୀ   ପ୍ରସ୍ତୁତି ପର୍ବରେ ମାତି । ସନ୍ତ୍ରାସବାଦକୁ ପ୍ରୋତ୍ସାହନ ଦେଇ  ଚାଲିଥିଲା ହୀନ ନୀତି ।୩। କାହିଁ ଗଲା ଅସ୍ତ୍ର କାହିଁ ଗଲା ଶସ୍ତ୍ର    ବିଜ୍ଞାନର କରାମତି । ସାମାନ୍ୟ କରୋନା ଏକାକୀ ଲଢ଼ୁଛି   ବଢୁଛି ଆତଙ୍କ ତାତି ।୪। ଭେଷଜ ବିଜ୍ଞାନ ପରାହତ ଆଜି   ମାତିଛି ଭୂତାଣୁ ଭୂତ । ହତ କରିବାକୁ ହାତ ପାଉ ନାହିଁ   ବିଶ୍ୱବାସୀ ସ୍ତମ୍ଭିଭୁତ ।୫। ସାରା ବିଶ୍ୱ ଆଜି ସ୍ତବ୍ଧ ଓ ଚକିତ   ଅସହାୟ ନିଃସହାୟ । ପ୍ରକୃତିର ଅସ୍ତ୍ର କରୋନା ଭୟରେ  ସ୍ଥାଣୁ ବିଶ୍ୱ ସମୁଦାୟ ।୬। ଚାଇନା ଦେଶର ଉହାନ ସହରେ  ଫୁଟିଲା ଭୂତାଣୁ ବୋମା । କାୟା ବିସ୍ତାରିଲା ସମଗ୍ର ବିଶ୍ୱରେ   ଅତିକ୍ରମ କରି ସୀମା ।୭। ବହୁ ଶକ୍ତିଶାଳୀ ବାହୁବଳୀ ଦେଶେ   ମହାମାରୀ ରୂପ ନେଇ । ଅଦୃଶ୍ୟ ରୂପରେ ଆକ୍ରମଣ କରି   ମାନବକୁ ଯାଏ ଖାଇ ।୮। ଅସ୍ତ୍ର ଶସ୍ତ୍ର ଶକ୍ତି ବିଜ୍ଞାନ ଉନ୍ନତି   ନିଜ ଅହଙ୍କାର ଗର୍ବ । ପ୍ରକୃତିର ରୋଷ କରେ ଧୂଳିସାତ  ଗର୍ବ ହୁଏ ଏବେ ଖର୍ବ ।୯। ଚିନ ଆମେରିକା ଇଟାଲୀ ଜର୍ମାନୀ   ଅଷ୍ଟ୍ରିଆ ବ୍ରିଟେନ୍ ସ୍ଘେନ୍ । ଫ୍ରାଆନ୍ସ ସ୍ୱିଜରଲାଣ୍ଡ ବେଲଜିୟମ   ନେଦରଲ୍ୟାଣ୍ଡ ଇରାନ୍ ।୧୦। ଦକ୍ଷିଣ କୋରିଆ ପର୍ତ୍ତୁଗାଲ ତୁର୍କୀ   ଭାରତ ନରୱେ ପାକ୍ । ଅଷ୍ଟ୍ରେଲିଆ କାନାଡ଼ା ଉଭୟ କୋରିଆ    ସବୁ ଦେଶ ହତବାକ୍ ।୧୧। ଅଛି ଆଉ ବାକି ଯେତେ ଦେଶ ବିଶ୍ୱେ    ଗଣନ୍ତି ପ୍ରମାଦ ବସି । କୋରନା ରାକ୍ଷସ ଆସୁଅଛି ମାଡି   କବଳରେ ଯିବେ ଫସି ।୧୨। ବିଶ୍ୱ ସଂକଟରେ ସର୍ବେ ଚିନ୍ତାଗ୍ରସ୍ଥ    ଗର୍ବ ଅହଙ୍କାର ଚୂର୍ଣ୍ଣ । ଇର୍ଷା ହିଂସା ଦ୍ୱେଷ ଦୁର୍ନୀତି ଶୋଷଣ    ସବୁ କିଛି ମୂଲ୍ୟହୀନ ।୧୩। ଜାତି ଧର୍ମ ବର୍ଣ୍ଣ ଧନୀ ଓ ଦରିଦ୍ର   ସର୍ବେ ଏବେ ଏକାକାର । ହୃଦୟକୁ ଘାରେ ଏକମାତ୍ର ଚିନ୍ତା  ମହାମାରୀ ହେଉ ଦୂର ।୧୪। ଏହି ମହାମାରୀ ସୂଚନା ଦେଉଛି   ସମଗ୍ର ବିଶ୍ୱକୁ ଏବେ । ଛାଡ ହିଂସା ବାଦ ଶତୃ ମନୋଭାବ  ବଞ୍ଚିବାକୁ ଚାହଁ ଯେବେ ।୧୫। ଜୀବଜଗତରେ କାହା ଅଧିକାର  କର ନାହିଁ କେବେ କ୍ଷୁର୍ଣ୍ଣ । ପ୍ରକୃତିକୁ ଛାଡି ସୃଷ୍ଟି  ଅସମ୍ଭବ  କର୍ମେ ଆଚାରିବା ଧର୍ମ ।୧୬। ପରିବେଶ ଆମ ବଞ୍ଚିବା ଆଧାର   ସୁସ୍ଥରେ ରହିବା ସ୍ଥାନ । ସ୍ଵଛ ପରିବେଶ ସବୁଜ ଧରଣୀ  ସୃଷ୍ଟି ପାଇଁ ଦେବା ଧ୍ୟାନ ।୧୭। ଜଳ ସ୍ଥଳ ବାୟୁ ହେଲେ ପ୍ରଦୂଷଣ   ବିଶ୍ୱ ତାପମାତ୍ରା ବୃଦ୍ଧି । ମେରୁ ହିମପିଣ୍ଡ ପାଣି ହୋଇଯିବ  ହଜିଯିବ ସବୁ ବୁଦ୍ଧି ।୧୮। ଆଗାମୀ ସୂଚନା ଦେଉଛି କୋରନା    ସଚେତନ ସର୍ବେ ହୁଅ । ସର୍ବ ଶ୍ରେଷ୍ଠ ଜାତି ଜୀବଜଗତରେ   ପରିଚୟ ତୁମ ଦିଅ ।୧୯। ଆମେ ପଶୁପକ୍ଷୀ ଜୀବାଣୁ ଭୁତାଣୁ    ଜୀବଜଗତର ଅଂଶ । ପ୍ରଭୁତ୍ୱ ବିସ୍ତାରି ହୁକୁମ ଜାରୀରେ  ନାଶ ନାହିଁ ଆମ ବଂଶ ।୨୦। ନିଜ ସ୍ଥାନେ ନିଜେ ଶାନ୍ତିରେ ବଞ୍ଚିବା   ହସିବ ଧରଣୀ ମାଆ । ପ୍ରଭୁ ଦୟାମୟ ସୃଷ୍ଟି କର୍ତ୍ତା ଆମ ସମସ୍ତଙ୍କୁ ହେବେ ସାହା ।୨୧।