ତୋର ମୋର ପ୍ରେମ କାହାନୀ
ତୋର ମୋର ପ୍ରେମ କାହାନୀ
ଶୁନ ଲୋ ସଜନୀ ମୋର ସାଙ୍ଗର ଜୁଲି
କହୁଛେ କାହାନୀ ଗୁଟେ
ସେ କାହାନୀ ତ ଲିଖାହେଇଅଛେ
ବିଧାତାର କଲମର ଚୁଟେ ।।
ଆଏ ତ କାହାନୀ ପ୍ରେମର ବଖାନି
ଆଏ ରଜା ରାନୀ କଥା
ତୁଇ ଅଉ ରାନୀ ମୁଇ ତୋର ରଜା
ଆଏ ତ ପ୍ରେମର ଗାଥା ।।
ରଜା ରାନୀ ଦୁହେଁ ହସି ଖୁସି ଥିଲେ
କଟୁଥିଲା ଦିନ ସୁଖେ
ରାନୀର ମନ ବୁଝିକରି ରଜା
ରହୁଥିଲେ ପାଖେ ପାଖେ ।।
କାହୁଁ ଥିଲା ବିପଦ ଆସଲା ମାଡି
କାଲ ହେଇକରି ସତେ
ସୁନ୍ଦର ଜୀବନ କେ ଛାରଖାର କଲା
ଦୁଖ ଛାଇଗଲା ପାଖେ ।।
ଖଟ ଧରିକରି ମୁର୍ଛା ହେଲେ ରାନୀ
ମାସ ମାସ ଧରିକରି
ଉସୋ କସା କେତେ କରଲେ ବଇଦ
ନେଇ ପାରଲେ ବନେ କରି ।।
ଖଟ ପାଖେ ରାଜା ବସିକରି ଏବେ
କହୁଛନ କାହାନୀ ଗୁଟେ
ଭାଏଲ କେ ରାନୀ ଉଠିଯିବା ବଲି
ପ୍ରେମର ତାକତ ବଲେ ।।
କାହାନୀ ବନେଇ କହୁଛେ ମୁଇଁ
ତୋର ମୋର କଥା ଆଏଜ୍
ଶୁନିକରି ତୁଇ ଉଠିଯା ସଜନୀ
ହସିଉଠୁ ପ୍ରେମ ରାଏଜ୍ ।।