ତୋ ପାଇଁ ବର୍ଷା କବିତା

ଅବୋଧ୍ୟ ଲିପି ତୁ

ଅବ୍ୟକ୍ତ ଗୀତି ତୁ

ଅବାଧ୍ୟ ମନର

ଅଭୁଲା ସ୍ମୃତି ତୁ

ମୋ ହୃଦ ତନ୍ତ୍ରୀର

ଅନାହତ ଧ୍ୱନି ତୁ

ପ୍ରୀତି ଶ୍ରାବଣର

ଗହିରୀ ତାଳ ବଣେ

ଅନ୍ଧାର ରାତିର

ଟିପ ଟିପ ଗୀତ ତୁ

ମେଘ ଆଉ ନିଦ

ନିଦ ଆଉ ମେଘ

ବିତିଗଲା ରାତିର

ଅଧା ଶୁଣା ଗପ ତୁ

ସହିଯାଉ ହସି

ନଇଁ ଯାଉ ହସି

ବର୍ଷାରେ ଜୁଡ଼ୁବୁଡ଼ୁ ଫୁଲର

ଉଲ୍ଲସିତ ରୂପ ତୁ

କେବେ ଥିଲୁ

ପହିଲି ଆଷାଢ଼ର

ଖସଡ଼ା ସଡକ ତୁ

ଝିଲିପି ବାଳରୁ

ଖସୁଥିବା କିଲିପି ତୁ

କିନ୍ତୁ ଏବେ

ପ୍ରେମୋତ୍ତୀର୍ଣ୍ଣ ଭୋଦୁଅର

କାଦୁଅ ତୁ

ସଘନ ତୁ,

ନିବିଡ ତୁ

ପତନୋନ୍ମୁଖୀ

"ବର୍ଷା"ର

ତୀର୍ଯ୍ୟକ୍ ରେଫ୍ ଚିହ୍ନ ତୁ

ମାଟିର ମହ ମହ ବାସ୍ନା ତୁ

ଧରା ସହ ଧାରାର

ସାନ୍ନିଧ୍ୟ ତୁ ।