ତମ ସହରରଟା ଆମ ଗାଁ ପରି ନୁହଁ

କେତେଦିନ ହେଲା ଚିଠିଟେ ଦେଇନି

     ଭୁଲି ଗଲିଣି ତା ନାଁ

ଅଙ୍କା ବଙ୍କା ନଈ ଆର ପଟେ ଦିଶେ

     ତା' ଝୁମ୍ପୁଡି ଟିକି ଗାଆଁ ।

ପ୍ରଥମ ଦେଖାରେ କହିଥିଲା ସିଏ

     ସହରଟା ଭାରି କ୍ରୁର

ସେ ସହରେ ରହି ପରଦେଶୀ ହେଲି

    ସିଏ ବି ଦେଉନି ଖଣ୍ଡେ ପତର ।

କହିବ କେ' ତାକୁ ବୁଝାଇ ସୁଝାଇ

     ଏ'ତ ମୋବାଇଲ ଯୁଗ

ରାତି ଦଉଡୁଛି ଦିନ ଦଉଡୁଛି

     ନାହିଁ ଆଉ ଚିଠି 

     ନାହିଁ ଆଉ ତାର ଭାବ ।

ଡାକବାଲା ଆଉ ଡାକ ଛାଡୁନାହିଁ

     ଚିଠି ନିଅ ଚିଠି ନିଅ

"ମାଗୁଣି ଶଗଡ" ଗଡୁନି ଗାଆଁରେ

     ଠେକା ବାନ୍ଧୁନାହିଁ ଚଷାପୁଅ ।

କନକ ଗୋରୀ ସେ ରୂପର ମାଧୁରୀ

     ତୁଠେ ମାଜୁଥାଏ ଦେହ

ଆଜି ବି କହୁଛି ତମ ସହରଟା

     ଆମ ଗାଆଁ ପରି ନୁହଁ ।