Library
ତମ ପ୍ରଶ୍ନରେ ନିରୁତ୍ତର
ତମ ପ୍ରଶ୍ନରେ ନିରୁତ୍ତର
ସ୍ୱପ୍ନଟିଏ ଦିନେ ଦେଖିଲି ନିିଦରେ
ଖୋଜୁଛି ତାହାର ଉତ୍ତର ।
କାହିଁକି ଦେଖିଲି ଏମିତି ସପନ
ଏଇ ଥିଲା ପ୍ରଶ୍ନ ମୋହର ।
ସପନ ବୃତ୍ତାନ୍ତ ନ କହିବି ଯେବେ
କିଏ ସେ ଜାଣିବ କିପରି ।
ଶୁଣ ମୋର ପ୍ରିୟ ଭାଇ ଭଉଣୀଏ
ସପନଟା ଥିଲା ଏପରି ।
ଅଧରାତିଟାରେ ଗାଁ ଶ୍ମଶାନରେ
ଦେଖିଲି ଧୂର୍ଜଟୀ ତାଣ୍ଡବ ।
ଡମ ଡମ ହୋଇ ଡମ୍ବରୁଧରଙ୍କ
ଡମ୍ବରୁ ନାଦେ କେ ଶୋଇବ ?
ଖାଁ ଖାଁ ସିନା ଶ୍ମଶାନ ଲାଗନ୍ତା
ଥିଲେ ଭୂତ ପ୍ରେତ ପିଶାଚ ।
ଶିବଙ୍କ ତାଣ୍ଡବ ନର କି ଦେଖିବ
ସତ ସପନ ନୁହେଁ ମିଛ ।
ଭାବିଲି ମନରେ ବଡ ଭାଗ୍ଯ ମୋର
ଦେବ ଦୁର୍ଲ୍ଲଭ ଏ ତାଣ୍ଡବ ।
କଲେ ଦରଶନ ଭାବେ ମନେ ମନ
ଜୀବନ କି ଆଉ ରହିବ ?
ନିଦରୁ ଉଠିଲି ଦୂରରୁ ଦେଖିଲି
ଗୋଟିଏ ମଣିଷ ନାହାନ୍ତି ।
ଘେନି ଭୂତ ପ୍ରେତ ପିଶାଚ ସଭିଙ୍କୁ
ଶଙ୍କର ତାଣ୍ଡବ ରଚନ୍ତି ।
ଦେଖିଲି ଏ ଦୃଶ୍ୟ ଯୋଡିଲି ମୋ ହାତ
ମୂର୍ଚ୍ଛିତ ହୋଇ ମୁଁ ପଡିଲି ।
କେତେବେଳେ ମୁହିଁ ହେଲି ସଚେତନ
କିଛି ମୁଁ ଜାଣି ନପାରିଲି ।
କାହିଁକି ଦେଖିଲି ଏପରି ସପନ
କେହି ତା' ଉତ୍ତର କହୁନି ।
ଏଇ ପ୍ରଶ୍ନ ତୁମେ ପଚାରୁଛ ମତେ
ଉତ୍ତର ଖୋଜି ମୁଁ ପାଉନି ।
