ଥୁଣ୍ଟାଗଛ
ଥୁଣ୍ଟାଗଛ
ମୋ' ଦେହରେ ତୁମରି ସ୍ପର୍ଶଟା ଯେବେ ରଙ୍ଗଦିଏ,
କଅଁଳିଆ ପତ୍ରସବୁ ଅଙ୍କୁରିତ ହୁଏ -
ମାଟିର ବୁକୁରେ ;
ମୋ' ନିଃଶ୍ୱାସରେ ତୁମ ପ୍ରଶ୍ୱାସଟା ଯେବେ ମିଶିଯାଏ,
ସଂପର୍କର ଫର୍ଦ୍ଦଟାଏ ଯୋଡିହୁଏ -
ଆମ ଜୀବନ ବହିରେ ।।
ସେ ବହିରେ ତୁମରି ପ୍ରେମଟା ଯେବେ ପଢ଼ିନିଏ,
ଛନଛନ ମନଟା ମୋ' ଜାଗିଉଠେ -
ସୂରୁଜ ଆଭାରେ ;
ମୋ' ବିଶ୍ୱାସରେ ତୁମ ଭରସାଟା ଯେବେ ଆଶାଦିଏ,
ଚୁପିଚୁପି ଫୁଲସବୁ ଫୁଟିଉଠେ -
ନୂଆ ମହକରେ ।।
ମୋ' ଗଭାରେ ତୁମ ସ୍ୱପ୍ନଟା ଯେବେ ଖୋସିହୁଏ,
ମିଠା ମିଠା ଫଳସବୁ ହସିଉଠେ -
ତୁମ ଯତନରେ ;
ମୋ' ପ୍ରତିଟି ଅଙ୍ଗରେ ତୁମ ଶୋଷ ଯେବେ ମେଣ୍ଟେ ,
ଶୁଖାଶୁଖା ବୟସଟା ଥକ୍କାମାରେ -
ସମୟ ବାଟରେ ।।
ତଥାପି....କାହିଁକି ????
ଛଳନାରେ ଛନ୍ଦିଦିଅ ମୋତେ,
ବିଶ୍ୱାସରେ ବିଷ ଭରିଦିଅ ;
ପ୍ରତିଦାନେ କିଛି ତ' ମାଗିନି...
କାହିଁ ତେବେ କଟୁରୀ ଉଠାଅ ??
ପ୍ରତିଅଙ୍ଗେ ନିଲାମଟେ କଷି,
ଖୁଣ୍ଟି ଖୁଣ୍ଟି ସବୁ ଲୁଟିନିଅ ;
ଆଉ କି' ବା ଅଛି ଯେ ଦେବାକୁ -
ଖାଲି ଯାହା ବେଲଗାମ୍ କୋହ ।।
ଲୁଟିବାରେ ଯଦି ଏତେ ମଜାଅଛି...
ଯାଃ...ସମର୍ପଣ କରିଦେଲି ଏ ଥୁଣ୍ଟାଦେହଟା ;
ଯେତେ ପାର ସେତେ ଲୁଟିନିଅ -
ଉଫ୍...ରାଣ ଅଛି ;
ଏ ଥୁଣ୍ଟାଦେହଟାର ବି' ଦାମଟାଏ ଅଛି ।।