ଲାଇବ୍ରେରୀ
ପ୍ରୋଫାଇଲ୍
ପ୍ରତାରଣା ର ପ୍ରତିବିମ୍ବ
ପ୍ରତାରଣା ର ପ୍ରତିବିମ୍ବ
ବିମ୍ବ ରୁ ପ୍ରତିବିମ୍ବ
ପ୍ରତାରଣାର ପ୍ରଚ୍ଛନ୍ନ ଇଙ୍ଗିତ ,
ହଜି ଯାଉଥିବା ଶୀତାର୍ତ୍ତର ସୋରିଷ କ୍ଷେତ
ବାଟବଣା ମୌସୁମୀର ଉଦ୍ଦାମ ସଙ୍ଗୀତ
କପୋତୀର ବାହୁନା କାନ୍ଦଣା
'ଉଠ୍ ପୁତା ଉଠ୍'
ସବୁଠି ପ୍ରତାରଣାର ଦିଶାହୀନ
ପାଲଟଣା ମନର ବୋଇତ !
ବିଶ୍ବାସର ବିସ୍ମୃତି ଭିତରେ
ସମ୍ମୋହନର ସନ୍ଧି କ୍ଷଣ
ପ୍ରତାରିତ ହୁଏ ,
ଗହଳ ମାଣ୍ଡିଆ କିଆରୀରେ
କିଏ ଛୁଏଁ ଜହ୍ନର ଚିବୁକ
କେଉଁ ଫୁଲଗଛ ମରିଯିବାର କାରଣ
ଖୋଜୁ ଖୋଜୁ ପ୍ରତାରଣା ଫସିଲ୍ ହୋଇଯାଏ
ଡଙ୍ଗର ତଳର କୁରେଇ ଫୁଲ,
ମାଆ କୋଳ ଶୂନ୍ୟ ପଡିଥାଏ
ନୀଳ ଆକାଶ ତଳେ !
କେଉଁଠି ଅଟକିଯାଏ କୃଷ୍ଣଚୂଡା ର
ଅର୍ଦ୍ଧ ମୁକୁଳିତ ମୁକୁଳ
କେଉଁଠି ହାଇ ମାରେ କାହା ପ୍ରତାରଣାର
କଳାଛାଇ ,
ମହାନଦୀ ର ନୀଳଢେଉ
ଜୀବନ ନାଟକର ଅଙ୍କ କଷୁଥାଏ
ଖରିବଣ ଶୂନ୍ୟ ସିକତାରେ ।
ଲଲିପପ୍ ଦେଖାଇ କିଏ ଭଣ୍ଡେ
କାଠ କେବିନ ତଳେ ଉଣ୍ଡେ
ପର କଅଁଳି ନଥିବା ଶାବକର ଡେଣା
ଗୋଟେ ରକ୍ତ ଜୁଡୁବୁଡୁ ଲାଲପରୀଟିଏ
ମୂର୍ଚ୍ଛିତ ହୋଇ ପଡିଥାଏ ପ୍ରତାରଣାର ପ୍ରହେଳିକାରେ !
ଗର୍ଭଣା ସଂକ୍ରାନ୍ତିରେ ଥୋର ବାହାରି ନଥିବା ଧାନକେଣ୍ଡା ଦେଖି
କାହା ମନତଳେ ଚରିଯାଏ ବିଷ
କିଏ ପ୍ରତିଶ୍ରୁତିର ପାହାଡ ମଥାନରେ
ଦେଖୁଥାଏ ପ୍ରତାରଣାର ଶେଷ ଇସ୍ତାହାର ,
କାକୁସ୍ଥ ସମୟ ଧୀରେ ଧୀରେ ନିଏ ଅବସର ।
ପ୍ରତାରଣାର ଶେଷ ସ୍ବର ଟିଏ
ଗୁମୁରି କାନ୍ଦୁଥାଏ
ପ୍ରେମର ପରିତ୍ୟକ୍ତ କାଗଜ ଠୁଙ୍ଗାରେ
ପାନ୍ଥଶାଳାର ଶିଉଳି ଚଟାଣରେ ,
ଭଙ୍ଗାଚୁଡି , ବିକ୍ଷିପ୍ତ ରେତ,
ଆଉ ରକ୍ତଭିଜା ଅନ୍ତଃବସ୍ତ୍ର
କାହା ସରଜମିନ ତଦନ୍ତର ଖୋରାକ ପାଲଟେ
ଶୀତ ସକାଳରେ ।
ପ୍ରତାରଣା ସରେ ନାହିଁ
ଜୀବନର ଖଣ୍ଡିତ କାବ୍ୟରେ ,
ନୂଆ ଆଶାର ଅରୁଣିମାରେ
କିଏ ଛୁଇଁ ଯାଏ ମନ ଉପକୂଳ
ପତଙ୍ଗର ନିଃସର୍ତ୍ତ ଆତ୍ମ ସମର୍ପଣ ପରି
ପ୍ରତାରଣା ଉଦ୍ଭାସିତ ହୁଏ
ସକାଳର ଖବର କାଗଜ ପୃଷ୍ଠାରେ !!
