ମିଛ ଗପ
ମିଛ ଗପ
ଆସ ଏଠି ଚୁପ୍ ଚାପ୍
ଗୁଲି ଗପ କରିବା ,
ନିଜ ପାଇଁ ନିଜେ ପୁଣି
ମିଛ ଗପ ଲେଖିବା ।
ତୋଳିବାନି ଗୋଲାପକୁ
ଆଖି ଭରି ଦେଖିବା,
ପ୍ରଜାପତି ଡେଣାପରେ
କବିତା ଟେ ଲେଖିବା ।
ଆସ ଏଠି ଚୁପ୍ ଚାପ୍.....!
ଓଟ କୁଜ ପରି ଦିଶେ
ଦୂର ଛୋଟ ପାହାଡ ,
ସବୁଜ ପଣତ ଢାଙ୍କି
କରିଛି କେ ଉହାଡ ।
ସରୁ ଟିକି ଝରଣାରେ
ଚାଲ କେବେ ଭିଜିବା ,
ଶିରି ଶିରି ପବନର
ମାଦକରେ ହଜିବା ।
ଆସ ଏଠି ଚୁପ୍ ଚାପ୍ ....!
ଜହ୍ନ ଆସି ଢାଳୁଥାଉ
ଜୋଛନାର ଜୁଆର ,
ରାତି ଯେତେ ବିତିଯାଉ
ଜଳୁ ପ୍ରୀତି ଜାଗର ।
କୋଇଲିର କୁହୁତାନ
କାନ ଡେରି ଶୁଣିବା ,
ଝିଙ୍କାରୀର ଶବଦରେ
ଆପଣା କୁ ଖୋଜିବା ।
ଆସ ଏଠି ଚୁପ୍ ଚାପ୍ ...!
ଗାଁ ତୋଟାମାଳୁ ଆସେ
ବଉଳର ବାସନା ,
ଭସା ମେଘ କୋଳେ ଲୁଚେ
ଜହ୍ନ କରି ବାହାନା ।
କିଛି କଥା ଓଠ ପରେ
ଆଖିରେ ବି କହିବା ,
କିଛି ଲାଜ କିଛି ହସ
କାଲି ପାଇଁ ରଖିବା ।
ଆସ ଏଠି ଚୁପ୍ ଚାପ୍ ....!
ଗପ କେବେ ସରିବନି
ସରି ଯିବ ସମୟ ,
କାଲି ପାଇଁ କଥା ରଖି
ମାଗି ନେବା ବିଦାୟ ।
ଆଖି କୋଣେ ଲୁହ ଭରି
ମନ ଭରି ଚାହିଁବା ,
ନାଲି ଓଠ ଧାରେ ଶେଷ-
ଚୁମା ଆମେ ମାଗିବା।
ଆସ ଏଠି ଚୁପ୍ ଚାପ୍....!!