ମୁଁ

କେବେ ଗଣିନି ବିତିଯାଇଥିବା ଦିନସବୁ,

ମାପିନି ବି ମୋ' ପାଇଁ କାହା ପ୍ରେମର ଗଭୀରତା ;

ଘଟଣା ଦୁର୍ଘଟଣାର ଢେଉ ଭିତରେ -

ଭାସି ଚାଲିଥିବା ବେଫିକର ନାଆଟାଏ ମୁଁ...

ନୀରବତାର ଶୀତଳ ସମୀର ଛୁଆଁରେ ଆକ୍ତାମାକ୍ତା।

କେବେ କହିନି ଉଙ୍କି ଉଠୁଥିବା କଥାସବୁ,

ପାଇନି ବି ମୋ' ପାଇଁ କାହା ଭାଗରୁ କାଣିଚେ ସମୟ ;

ପର ଆପଣାର ପରିଧି ଭିତରେ -

ଚୁପଚାପ ହେଇ ବସିଥିବା କେନ୍ଦ୍ରବିନ୍ଦୁଟାଏ ମୁଁ...

ଅଗଣିତ ବ୍ୟାସ ଆଉ ବ୍ୟାସାର୍ଦ୍ଧର ଫାଙ୍କେ ଖୋଜେ ପରିଚୟ।

କେବେ ଜାଳିନି ଧସେଇ ପଶୁଥିବା କୋହସବୁ,

ପାରିନି ବି ମୋ' ପାଇଁ କାହା ହୄଦୟର ଜ୍ୱାଳାକୁ ଲିଭେଇ ;

ଭୁଲ୍ ବୁଝାମଣାର ଅନ୍ଧାର ପକେଟ ଭିତରେ -

ଆଲୁଅର ସ୍ୱପ୍ନ ଦେଖୁଥିବା ଚଉତା ରୁମାଲଟାଏ ମୁଁ...

ଓଦାହୁଏ ଆଉକାହା ନିଗିଡ଼ା ଲୁହରେ ନିଜକୁ ଭିଜେଇ।