ଭାବଗ୍ରାହୀ
ଭାବଗ୍ରାହୀ
ଶ୍ରୀଅଙ୍ଗେ ପୀତବସନ ଶ୍ରୀପାଦେ ନୂପୁର
ରଙ୍ଗ ଅଧରରେ ଶୋହେ ବଇଁଶୀର ସୁର
ରୂପ ନୀଳମଞ୍ଜୁଳ ଶୀରେ ଶିଖୀର ଚୁଳ
ତ୍ରିଭଙ୍ଗୀ ଠାଣିରେ ହସ କି' ମନୋହର ।
ନନ୍ଦଲାଲା,ବାସୁଦେବ, ଗୋପୀଜନମନ
ଯଶୋଦାର ପ୍ରାଣଧନ,ଦେବକୀନନ୍ଦନ
ସୁଦାମାର ବାଲ୍ୟବନ୍ଧୁ,ସଖା ଯେ ଅର୍ଜୁନ
ରାଧାରାଣୀ ପ୍ରେମନାହା,ମୀରାର ସପନ ।
ଚତୁର୍ଭୁଜେ ଶୋଭେ ଚକ୍ରରାଜ ସୁଦର୍ଶନ
କୌମୋଦିକୀ ଗଦା, ପଦ୍ମ, ଶଙ୍ଖ ପଞ୍ଚଜନ୍ୟ
ପକ୍ଷୀରାଜ ଶ୍ରୀଗରୁଡ଼ ଅଟନ୍ତି ବାହନ
ନରରୂପୀ ନାରାୟଣ ଶ୍ରୀକୄଷ୍ଣ ଭଗବାନ ।
ଯେବେ ମର୍ତ୍ତ୍ୟପୁରୀ ହୁଏ ପାପଭାରେ ଭାରି
ଯୁଗେ ଯୁଗେ ହରି ନାନାରୂପେ ଅବତରି
ଧର୍ମଧ୍ୱଜା ଧରି ନାଶି ସାଧୁଜନ ଅରି
ବରଷନ୍ତି ସତ୍ୟ,ଶାନ୍ତି, ପ୍ରେମ, କୄପାବାରି ।
କଳିଯୁଗେ ଦାରୁଦିଅଁ ଜଗନ୍ନାଥ ନାମେ
ଘେନି ଭ୍ରାତାଭଗ୍ନୀ ଉତ୍କଳର ପୁଣ୍ୟଧାମେ
କଳାକଳା ଚକାଡୋଳା ଶ୍ରୀକଳା ବଦନେ
ହରଷନ୍ତି ଭାବଗ୍ରାହୀ ଭାବେ ଭକ୍ତଜନେ ।