ଅନ୍ଧକାର

ସଞ୍ଜ ନଇଁଲେ ଅସଂଖ୍ୟ ଖର୍ବକାୟ ବିଷାକ୍ତ ଜୀବ

ଆପଣାର ଗୁପ୍ତ ଠିକଣାରୁ ଆସନ୍ତି ବାହାରି ପଦାକୁ

ତୀକ୍ଷ୍ନ ମୁନିଆ ପଞ୍ଝା ମେଲି ଖାଇବାକୁ ଝୁଣି ଝୁଣି

ଅପେକ୍ଷାକୃତ ଦୁର୍ବଳ ପ୍ରାଣୀର ନରମ କଅଁଳ ମାଉଁସ

ବଡ଼ ବିଚିତ୍ର ଏଇ ଜୀବଙ୍କର ଭୋକ ଆଉ ଶୋଷ

ବହୁ ଦୂରୁ ଜାଣିପାରନ୍ତି ଏମାନେ ଶିକାରର ବାସ

ଟକ୍ ମକ୍ ହୋଇ ଜାଗି ଉଠେ ଜାନ୍ତବ ବିକାର

ହୁତୁ ହୁତୁ ଜଳି ଉଠେ କ୍ଷୁଧାର ଅନଳ ଦୁର୍ବାର ll

ଯେତେ ଝୁଣି ଟାଣି ଖାଇଲେ ବି ରକ୍ତ ମାଂସ ହାଡ

ମେଣ୍ଟେ ନାହିଁ ଆଦିମ ଜାନ୍ତବ ଆସୁରିକ ପିପାସା

ଅସରନ୍ତି ଅଦମ୍ୟ ପାଶବିକ ପୈଶାଚିକ ନିଶା

ସର୍ବଗ୍ରାସୀ ତୃଷ୍ଣା ଚାହେଁ କରିବାକୁ ବ୍ରହ୍ମାଣ୍ଡକୁ ଗ୍ରାସ

ଲଭିବାକୁ ତହିଁରେ ଆତ୍ମ ତୃପ୍ତିର ପରମ ସନ୍ତୋଷ

ଯେ ପର୍ଯ୍ଯନ୍ତ ପୂର୍ବାକାଶେ ସୂର୍ଯ୍ୟର ହୋଇନି ପ୍ରକାଶ

ପଶ୍ଚିମାକାଶେ ପୁଣି ସୂର୍ଯ୍ୟ ହେଲେ ଅସ୍ତାଚଳଗାମୀ

ଏଇ ବିଷାକ୍ତ ଜୀବଙ୍କ ଉପଦ୍ରବେ କମ୍ପଇ ମେଦିନୀ ll