ରଜ ମଉଜ

ବୋଉ ପାଟ ଶାଢୀ   କୁନି ନାଲି ଚୁଡି

ମୋ ପଇସା କୁଆଡେ ଗଲା

ବଡ ପାଟି କରି      ଛାଡିଲି ମୁଁ ରଡି

ଏଠିକି କିଏ ଆଣିଲା (1)

ଚାରି ପଟେ ମୋର  ଘେରି ରହିଥିଲେ

ଡାକ୍ତର ଓ ଥାନା ବାଲା

ହଲାଇ ହଲାଇ କହୁଥିଲେ ମୋତେ

ଏଇ ତ ଚେତା ଆସିଲା (2)

କୋଉଠୁ ଆସିଲ     କିଆଁ ପଡିଥିଲ

କାହା ସଙ୍ଗେ କଲ କଳି

ରାସ୍ତା କଡେ ତୁମେ   ପଡିଥିଲ ଦେଖି

ଖବର ଦେଲେ ବିକାଳି (3)

ସୁରଟରୁ ପରା        ଆସୁଥିଲି ଧାଇଁ

କପଡା ପଇସା ଧରି

ବୋଉ ଡାକିଥିଲା     ରାଣ ଦେଇ କରି

ରଜକୁ ଆସିବୁ ଫେରି (4)

ବାଟରେ କାହାଠୁ      କିଛି ଖାଇଲକି

ଖାଇଲ କି ଭାଇ ଧୋକା

ଲୁଟିଆ ଜାଲରେ      ଫସିତ ଯାଇନ

ମନେ ପକା ମନେ ପକା (5)

ସାଙ୍ଗରେ ବସିଲେ    ହସି କଥା ହେଲେ

ସାନ ଭଉଣୀ ସମାନ

ପୋଡ ପିଠା ଖଣ୍ଡେ   ହସି ବଢାଇଲେ

ଆଉ ଖଣ୍ଡେ ଖିଲି ପାନ (6)

ଆଜି ପରା ରଜ       ଓଡିଆଙ୍କ ପର୍ବ

ସବୁଠାରୁ ଶୁଭ ଦିନ

ନିଜର ଭାବିକି        ମନା କରିବନି

ରଖିବ ଭଉଣୀ ମାନ (7)

ଖାଇକରି ପାନ       ସପନେ ବୁଲିଲି

ଆଖିକୁ ଆସିଲା ନିଦ

ବଞ୍ଚିଗଲ ଭାଇ        ପୁଲିସି କହିଲେ

ଡାକ୍ତରଙ୍କୁ ଧନ୍ୟବାଦ (8)