ମୋ ଗାଆଁ

ମୁଁ ଏବେ ଅଚିହ୍ନା  ମୋ ଗାଆଁ ମାଟିରେ

ପ୍ରଶ୍ନ ସଭିଙ୍କ ଆଖିରେ

କୁଆଡୁ ଆସିଲା        ଅଜଣା ଚଢେଇ

ମିଶୁନି ଆମ ଭିତରେ।

ଚିହ୍ନା ଲୋକେ ସବୁ   ଗଲେଣି କେବେଠୁ

ଭେଣ୍ଡା ହୋଇଲେଣି ଛୁଆ

ଯିବା ପାଇଁ ବେଳ      ଆମର ହେଲାଣି

ଡାକୁଛି ମଶାଣି ନିଆଁ ।

ଏହି ଗାଆଁ ମାଟି      ପବନେ ବଢିଛି

ମୋହର ବାଲ୍ୟ ଶୈଶବ

ପେଟ ଚାଖଣ୍ଡକ      ପାଇଁ ଘୁରି ବୁଲି

ପାଇଲିନି କାହିଁ ଠାବ ।

ଲୋକ ପଛେ ମୋତେ ନ ଚିହ୍ନନ୍ତୁ କେହି

ଗାଆଁ ଦାଣ୍ଡ ମୋର ସାକ୍ଷୀ

ବଦଳି ଗଲେ ବି        ରଙ୍ଗ ରୂପ ତାର

ଧରୁଛି ମୋତେ ସେ ଚାପି।