ତାଣ୍ଡବ

ହେ ମହାଦେବ ପ୍ରଭୁ ସଦାଶିବ!

ପୁନର୍ବାର ତୁମ୍ଭେ ରଚ ହେ ତାଣ୍ଡବ

ରଚ ହେ ତାଣ୍ଡବ ବାରେ

ଆଜି କାନ୍ଦୁଛି ବିକଳେ

କଇଁ କଇଁ ହୋଇ ସସାଗରାଧରା

ଏଇ ମଣିଷର ପାପ ଭାରେ !

ହେ ମହାରୁଦ୍ର ପ୍ରଭୁ ମହାକାଳ!

ଫେଡ଼ି ଦେଇ ତବ ତୃତୀୟ ନୟନ

କର ହେ ଅନଳ ବର୍ଷା

ସେଇ ଦାବାନଳରେ ଦୂରେଇ ଯାଉ

ସବୁ ନାରକୀୟ ହିଂସା !

ହେ ନଟରାଜ ପ୍ରଭୁ ଭୋଳାଶଙ୍କର!

ରଚ ହେ ତାଣ୍ଡବ ବାରେ

ଡମ୍ବରୁ ବାଦ୍ୟରେ ଭୀତି ସଞ୍ଚାର

କର ହେ ପାପର ସଂହାର

ହରି ନିଅ ଧରଣୀର ଭାର !

ହେ ତ୍ରିଭୁବନେଶ୍ବର ପ୍ରଭୁ ପଶୁପତି!

ମୁଁହିଁ ମୂଢମତୀ କରଇ ବିନତି

ରଚ ହେ ତାଣ୍ଡବ ବାରେ

ତ୍ରିପୁର କମ୍ପିବ ତୁମ୍ଭରି ହୁଙ୍କାରେ

ଧର୍ମର ହୋଇବ ଜୟ ସଂସାରେ !

ହେ ଶିବଶମ୍ଭୁ ପ୍ରଭୁ ଆଦିଦେବ!

ଅନାଦି ଅନନ୍ତ ସର୍ବଶକ୍ତିମାନ

ତୁମ୍ଭେ ହିଁ ସୃଷ୍ଟିର ଆଦି ପୁରୁଷ

ଫେଡ଼ି ଦେଇ ତୁମ୍ଭ ତୃତୀୟ ନୟନ

ନାଶ କର କଳି କଳୁଷ !

ହେ ମହେଶ ପ୍ରଭୁ ବିଶ୍ବେଶ୍ବର!

ଏହି ଅକିଞ୍ଚନ ଜନେ କୃପା ବହି

ତୁମ୍ଭରି ଚରଣେ ଦିଅ ହେ ଶରଣ

ଷଡରିପୁ ହରି ଭବୁ ପାରିକର

ଜୀବାତ୍ମା ମୋହର ହେଉ ଉଦ୍ଧାର !