ସୁସନ୍ତାନ

ଷାଠିଏ ହଜାର ପୁଅ ସଗର ରାଜାର

କପିଳଙ୍କ ଅଭିଶାପେ ହେଲେ ଭସ୍ମସାର |

ଏମାନଙ୍କୁ ଉଦ୍ଧରିବା ପାଇଁ ଭଗୀରଥ

ରାଜା ଦିଲ୍ଲୀପଙ୍କ ପୁତ୍ର ହୋଇଲେ ସମର୍ଥ |

ସେହି ଯୋଗ୍ୟ ସୁତ ଗଙ୍ଗା ମର୍ତ୍ତ୍ୟକୁ ଆଣିଲା 

ଏଣୁ ଗଙ୍ଗା ନାମ ଭାଗିରଥୀ ବୋଲାଇଲା |

କର୍ଦ୍ଦମ ଦେବହୁତିଙ୍କ ସୁଯୋଗ୍ୟ ସନ୍ତାନ

କପିଳ ପିତା ମାତାରେ ଦେଲେ ବ୍ରହ୍ମଜ୍ଞାନ |

ଯମଦଗ୍ନି ରେଣୁକାଙ୍କ ପୁତ୍ର ପର୍ଶୁରାମ

ଏକା ଏକୋଇଶ ବାର ଭ୍ରମି ଧରାଧାମ |

କ୍ଷତ୍ରିୟ ରକ୍ତରେ କଲେ ପିତୃ ତରପଣ

ଚିରଞ୍ଜିବୀ ଭଗବାନ ଗୁରୁ ଅଗ୍ରଗଣ୍ୟ |

ଏକା ଯୋଗ୍ୟ ପୁତ୍ର ଥିଲେ ଶ୍ରବଣ କୁମାର

ପିତୃ ମାତୃ ଭକ୍ତ ଅଦ୍ଵିତୀୟ ଗୁଣାଧାର |

ରାମଚନ୍ଦ୍ର ଦଶରଥ ସୁଯୋଗ୍ୟ କୁମର

ସାଗର ବନ୍ଧନ ଦଶକନ୍ଧ ନାଶକର |

ଦ୍ୱାପରେ ଯୋଗ୍ୟ ସନ୍ତାନ ଶାନ୍ତନୁ କୁମର

ଗଙ୍ଗା ପୁତ୍ର ଭୀଷ୍ମ ରଚି କୀରତି ଅମର |

ବାସୁଦେବ କୃଷ୍ଣଚନ୍ଦ୍ର ରାଜା ଯୁଧିଷ୍ଠିର

ଅକଳଙ୍କ କୀର୍ତ୍ତିକର ଅମଳିନ ଚିର |

କଳିରେ ମହାତ୍ମା ଗାନ୍ଧି ସୁବାସ ଚୈତନ୍ୟ

ବୁଦ୍ଧ ଶଙ୍କର ଅଟଳ ମୋଦି ମହାତ୍ମନ |

ଜୀବନେ ହୋଇବ ପିତାଙ୍କର ଅନୁଗତ

ଆଜ୍ଞାବହ ପାଳନ ପୋଷଣ ସେବା ରତ |

ମୃତାନ୍ତେ ଭରି ଭୋଜନ ଅସ୍ଥି ବିସର୍ଜନ

ପିତୃ ଋଣ ପରିଶୋଧ ଆକାଂକ୍ଷା ପୂରଣ |

ଯୋଗ୍ୟ ସନ୍ତାନର ଏହି ବିଶିଷ୍ଟ ଲକ୍ଷଣ

କଳିଯୁଗେ ଏ ଆଦର୍ଶ ଆଜି ପ୍ରହସନ |

ଜରା ନିବାସରେ ରହୁ ଛନ୍ତି ମାତାପିତା

ଧିକ ସେହି କୁଳାଙ୍ଗାର ଶିକ୍ଷିତ ଶିକ୍ଷିତା |