ସୁଖଦିନ ଆୟୁ ଅଳପ

ବଡ ପଟୁଆର କରି ଋତୁରାଜ ଆସିଲା,

ପାଦପ ପଲ୍ଲବି ସବୁଜ ସବୁଜ ଦିଶିଲା |

ଗଛଡାଳେ ନେନ୍ଥିନେନ୍ଥି ଫୁଲକଢ଼ି ଧରିଲା,

କିଛିଦିନପରେ ଫୁଟି ମହମହ ବାସିଲା |

ଶିମିଳି,ପଳାସ ବଣମୁଲକରେ ହସିଲା,

କୋଇଲିର କୁହୁତାନ ଚୁତଡାଳୁ ଶୁଭିଲା |

ଦକ୍ଷିଣଦିଗରୁ ମଳୟ ପବନ ବହିଲା,

ଗାଆଁରେ ଗାଆଁରେ ଦୋଳମେଳଣ ବି ଜମିଲା 

ଦିନକେଇଟାରେ ଧରଣୀର ତାପ ବଢିଲା,

ମଳୟବାଆଟା ଝାଞ୍ଜିହୋଇ ମାଡି ଆସିଲା |

ବାଟଘାଟ ତାତି ନିଆଁପରି ସେତ ଲାଗିଲା,

ପାଣିପାଇଁ ଚାରିଆଡେ ହାହାକାର ପଡିଲା |

ଗମ୍ ଗମ୍ ଝାଳ ବୋହି ଦେହଲାଗେ ଚିକିଟା,

ଫ୍ୟାନ,ଏ.ସି,କୁଲରର ବଢ଼ଗଲା ଭାଉଟା |

ଚାଆର ଆଦର କମି ଲସିଦାମ୍ ବଢ଼ିଲା,

ତବତ ନିରବି ପଖାଳକୁ ବାଟ ଛାଡିଲା |

ବସନ୍ତର ସୁଖ ନାହିଁ ଏବେ ଆଉ ମହୀରେ,

କେବେ ଆସି କେବେ ଗଲା ଜାଣିହେଲା ନାହିଁରେ |

ସେଦିନର କଥା ଲାଗେ ଆଜି ସତେ ଗଳପ,

ବୁଝିଗଲୁ ଏବେ ସୁଖଦିନ ଆୟୁ ଅଳପ |