ସତରେ କଣ ପାହିଛି ରାତି

ସତରେ କଣ ପାହିଛି ରାତି

ହେଲାଣି ସୂର୍ଯ୍ୟୋଦୟ

ଫାଟି ସିନ୍ଦୂରା ପୂର୍ବାଶା ନାଲି

ହେଲା କି ସତକୁହ ।

ରହିଛି ଘୋର ଅମା ଅନ୍ଧାର

ଅଭାବ ଦୁଃଖ ଦୈନ୍ୟ

ମରୁଛି ଶିଶୁ ପୋଷଣ ବିନା

ପାଉନି ମୁଠେ ଅନ୍ନ ।

ହାତ ପତାଇ ମାଗୁଛି ଭିକ

ଗରିବ ଅସହାୟ

ମରୁଛି ସଢି ପଛେ ମଣିଷ

ଖୋଜି ପାଉନି ନ୍ୟାୟ ।

ପାଏନି ରୋଗୀ ପଥି ଔଷଧି

ଘୋଟଇ ମହାମାରୀ

ସଳଖି ଅଣ୍ଟା ପାରିନି ଏବେ

ଅବଳା ଦୁଃଖୀ ନାରୀ ।

ଶିକ୍ଷାର ନାମେ ଚାଲେ ବ୍ୟାପାର

ଧର୍ମକୁ ଆଖିଠାର

ଚାଲେ ଦିନରେ କିଳାପୋତେଇ

ଅନ୍ୟାୟ ଧରମାର ।

ମାଡି ଚାଲୁଛି ପାପ ଦୁର୍ନୀତି

ବ୍ୟାପେ ଅରାଜକତା

ବଢେ ବହୁତ ଧନ କୂବେର

ସମ୍ପତ୍ତି କଳାଟଙ୍କା ।

ବଢେ ସଙ୍କଟ ଦେଖି ଅନ୍ଧାର

ଲାଗେ ଆତଙ୍କ ଭୟ

ପାହୁ ଏ ରାତି ଶୁଭ ପ୍ରଭାତେ

ହେଉ ଅରୁଣୋଦୟ ।