ସ୍ଵତନ୍ତ୍ର ମୋ ଓଡ଼ିଶା ଭୂଇଁ

ମୋ ଓଡ଼ିଶା କଳା ପୃଥିବୀ ବିଖ୍ୟାତ

ବିବିଧ ଶିଳ୍ପ ଶୋଭାର ଭଣ୍ଡାର ,

ବସ୍ତ୍ର ଶିଳ୍ପ ଠାରୁ , ତାରକସୀ ଶିଳ୍ପ

ସବୁଠାରେ ଲୋକପ୍ରିୟ ତାହାର ।

ଧନ୍ୟ କଳାକିର୍ତ୍ତୀ ଧନ୍ୟ କଳାକାର

ବିବିଧ କଳାର ତୁ' ଗନ୍ତାଘର ,

ପାଷାଣ ମନ୍ଦିରେ ହସେ ଶିଳା ବାଳା

ମନଲୋଭା ଭରା ଦୃଶ୍ୟ ସମ୍ଭାର ।

ଲୋକନୃତ୍ୟ ସାଥେ ଓଡ଼ିଶୀର ଛନ୍ଦ

ତାଳେ ତାଳେ କରଇ ମନ୍ତ୍ରମୁଗ୍ଧ ,

ସ୍ୱଦେଶେ, ବିଦେଶେ ଦୂର ଦୂରାନ୍ତରେ

ଲୋକେ ଦେଖି ହେଇଯାଆନ୍ତି ସ୍ତବ୍ଧ ।

ବାର ମାସେ ତେର ପର୍ବ ପର୍ବାଣୀରେ

ଓଡ଼ିଆ ପର୍ବର ଅପୂର୍ବ ଗାଥା ,

ରଜ ଠାରୁ ନେଇ ରଥ ଯାତ୍ରା ଯାଏ

ଦିଏ ଭାଇଚାରା ମୈତ୍ରୀର ବାର୍ତ୍ତା ।

ପୁଣ୍ୟଭୂମି ପୂତ ଦେବଭୂମି ଆମ

ଉତ୍କଳ ଜନନୀ ଜନମ ଭୂଇଁ ,

ଦାରୁବ୍ରହ୍ମ ରୂପେ ଜଗତର ନାଥ

ବିଜେ ମହାପ୍ରଭୁ ଜଗତ ସାଇଁ ।